ମୁକ ସାକ୍ଷୀ ବାରବାଟୀ

ଐତିହ ସହର   କଟକ ନଗରେ

   ମୁକ ସାକ୍ଷୀ ବାରବାଟୀ ।

ଇତିହାସ କହେ  ଅତୀତ କାହାଣୀ

   ଦୁର୍ଗ ସ୍ମୃତି ପରିପାଟି

ଭଗ୍ନ ଦୁର୍ଗ ଏବେ  ଉତ୍କଳ ସ୍ମାରକୀ

    ଲିଭିନି ଐତିହ କଳା ।

ଜରାଜୀର୍ଣ୍ଣ ହୋଇ  ରହିଛି ଅନେଇ

   ବାରବାଟୀ ଭଗ୍ନ ଶିଳା

ଗଙ୍ଗ ବଂଶ ରାଜା  ଅନଙ୍ଗ ତୃତୀୟ

   ମହାନଦୀ ପାରି ହୋଇ ।

ଆସିଥିଲେ ଦିନେ ବାରବାଟୀ ଗ୍ରାମେ  

   ଭ୍ରମଣ କରିବା ପାଇଁ

ଭୌଗଳିକ ସ୍ଥିତି ପ୍ରକୃତି ଶୋଭାରେ  

   ବିମୋହିତ ହୋଇଥିଲେ ।

ରାଜଧାନୀ ପାଇଁ  ନିଷ୍ପତି ସେ ନେଇ 

   ନିର୍ମାଣର ଶୁଭ ଦେଲେ

ବର୍ଗକ୍ଷେତ୍ର ପରି  ଏକଶତ ଦୁଇ

   ଏକର ଜାଗାକୁ ନେଇ ।

ନଅ ମହଲାର  ଦୁର୍ଗ ସେ ତୋଳିଲେ

   କଳାକୃତିରେ ଖୋଦେଇ

ଶତୃ ଆକ୍ରମଣ  ପଣ୍ଡ କରିବାକୁ  

    ଦୁର୍ଗର ସୁରକ୍ଷା ପାଇଁ ।

ଦୁର୍ଗ ଚାରିପାଖେ  ଗଡ଼ଖାଇ ଖୋଳି

   ସୁରକ୍ଷା ଦେଲେ ବଢ଼ାଇ

ଚୌଦ୍ୱାର ଛାଡି  ବାରବାଟୀ  ଆସି

    ନୂଆ ରାଜଧାନୀ କରି ।

ଗଙ୍ଗବଂଶ ରାଜା  ଅନଙ୍ଗ ତୃତୀୟ

    ଶାସନ ରଖିଲେ ଜାରି

କାଳର ଗ୍ରାସରେ  ଗଙ୍ଗ ବଂଶ ପରେ

   ମରାଠୀ ଓ ମୁସଲମାନ ।

ସେହି ବାରବାଟୀ  ରାଜଧାନୀ କରି

   ରାଜ୍ୟକୁ କଲେ ଶାସନ

ଅଷ୍ଟାଦଶ ତିନି  ଅକ୍ଟୋବର ମାସେ

   ଇଂରେଜ ଶାସକ ଦଳ ।

ବାରବାଟୀ ଦୁର୍ଗ  କଲେ ଅକ୍ତିଆର

   ଆସିଲା ଦୁର୍ଦ୍ଦିନ ବେଳ

ରାଜଧାନୀ ହେଲା  ରାଜ ବନ୍ଦୀଶାଳ

    ଅବକ୍ଷୟ ଆରମ୍ଭିଲା ।

କେତେ ରାଜା ମହା  ରାଜ ବନ୍ଦୀଙ୍କର

   ମୁକସାକ୍ଷୀ ପାଲଟିଲା

ଉଣେଇସ ଛତିଶ  ନୂତନ ପ୍ରଦେଶ

    ଉତ୍କଳ ମାନ୍ୟତା ପାଇ ।

ବନ୍ଦୀଶାଳ ହେଲା  ରାଜଧାନୀ ପୁଣି

   ରକ୍ଷା ବି ପାଇଲା ନାହିଁ

ରକ୍ଷଣା ବେକ୍ଷଣ  ଅବହେଳା ପାଇଁ

    ବାରବାଟୀ ଭଗ୍ନ ସ୍ତୁପ ।

ସୁଉଚ୍ଚ ପ୍ରାଚେରୀ  ହଜି ତ ଯାଇଛି

   ରହିଛି ପ୍ରବେଶ ପଥ

ଗଡ଼ଖାଇ ଏବେ  ପୋତି ହୋଇଯାଇ

    ଜଳକୁମ୍ଭୀ ଫୁଲେ ଭରା ।

ଅତୀତ କୀର୍ତ୍ତିକୁ   ଅବଲୁପ୍ତ କରେ

   ଦେଖେଇ ତା'ର ଚେହେରା

ପ୍ରତ୍ନତତ୍ତ୍ୱ ସଂସ୍ଥା  ସୁରକ୍ଷା ବ୍ୟବସ୍ଥା

    ଅଶାର ଟିକେ ଆଲୋକ ।

ଭଗ୍ନ  ବାରବାଟୀ   ଉତ୍କଳ ସ୍ମୃତିକୁ

    ପ୍ରଦାନ କଲେ ଝଲକ

ଜରାଜୀର୍ଣ୍ଣ ଦୁର୍ଗ  ଅତୀତର  କୀର୍ତ୍ତି

     ପାଇ ନବ ଯଉବନ ।

ପର୍ଯ୍ୟଟନ ସ୍ଥଳୀ  ଜନ ଗହଳିରେ

   ବୃଦ୍ଧି ହେବ ରାଜ୍ୟ ମାନ