ମୋ ପିଲାଦିନ

ବର ଉହୋଳରେ ଦୋଳି ଝୁଲୁଥିଲି

ଗାଇ ଗାଇ ଦୋଳି ଗୀତ,

ସାଙ୍ଗ ସାଥୀ ହେଇ ଅନ୍ତାକ୍ଷରୀରେ

ଡାକି ମକର ସଙ୍ଗାତ | ( ୧)

ମାଟି ହାଣ୍ଡି ଥୋଇ ଖପରା ଖଣ୍ଡରେ

ଭାତ ତରକାରୀ ରନ୍ଧା,

ସଜନା ସାଗକୁ କଣ୍ଟା ବାଇଗିଣି

ଖୋଳିଦେଇ ତଳେ ଖନ୍ଦା | (୨)

କାଚ ବାଟି ଖେଳ ଗେଚା ମରା ସାଥେ

ଚୋର ଚୋରଣୀ ଲୁଚିକାଳି,

ବାଲି ଗଦା ଦେଖି ଇଟା ଗାଡି ଚାଲେ

ଘୁଉଁ ଘୁଉଁ ଶବ୍ଦ ବୋବାଳି | (୩ )

ବର୍ଷା ହେଲେ ଯାଇ ସାରୁ ପତ୍ର ତଳେ

ଲୁଚି ଯାଏ ଛତା କରି,

ନାଲିଆ ସାଧବ ବହୂକୁ ଖୁସିରେ

ଦେଖୁଥାଏ ହାତେ ଧରି | (୪ )

ତାଳ ଗଛେ ବାଈ ଚଢେଇର ଗୀତ

ବସା ଯଦି ଛିଣ୍ଡି ଯାଏ,

ସେ ବସାକୁ ଧରି ଝୁଲା ମୁଣି କରି

ସାହି ସାରା ବୁଲୁଥାଏ | (୬ )

ଛଣ ଘର ଦେଖି ଘର ଚଟିଆଟି

କିଚିରି ମିଚିରି କରେ,

ଛୁପି ଛୁପି ଯାଇ ତା ବସା ଆଗରେ

ହାତ ମାରୁଥାଏ ଧୀରେ | (୭ )

ପଳାସ ପତରେ ସାର୍ଟ ପ୍ୟାଣ୍ଟ ଗୁନ୍ଥି

ପିନ୍ଧୁଥାଏ ସାଥୀମେଳେ,

କାଗଜ ଡଙ୍ଗାରେ ବୋଇତ ବନ୍ଦାଣ

ସତେକି ବଣିଜ କାଳେ | (୮ )

ପାଠ ପଢା ନାଆଁ ଧରିଦେଲେ କେହି

ଲୁଚେ ପାଳ ଭାଡ଼ି ତଳେ,

ଆଉ କେତେବେଳେ ଘଛରେ ଚଢିକି

ଦିନ କଟିଯାଏ ଭଲେ | (୯ )

ଘରକୁ ଆସିଲେ ଛାଟ ଛିଣ୍ଡିଯାଏ

ପଢ଼ି ଯାଇ ନାହିଁ ବୋଲି,

ବହି ବସ୍ତାନି ସାଥେ ବାପା ଟାଣି ଧରି

ବିଦ୍ୟାଳୟ ନିଅନ୍ତି ଠେଲି | (୧୦ )

ରାଗ ରୂଷା ନାହିଁ ମାନ ଅଭିମାନ

ନାହିଁ କେହି ଶତୃ ସମ,

ସର୍ବେ ସାଙ୍ଗସାଥି ହସି ଖେଳି ମିଶି

କଟି ଯାଏ ସବୁଦିନ | (୧୧ )

ଆଜି ମୁଁ ସାଜିଛି ପ୍ରାପ୍ତ ବୟସ୍କଟେ

ପାଉ ନାହିଁ ସେହି ଦିନ,

ସତେକି ହଜିଲା ବୟସର ସାଥେ

ସ୍ମୃତି ଲାଗେ ଆଜି ସ୍ବପ୍ନ | (୧୨ )