ମୋ ପାଇଁ ନୂଆବର୍ଷ

ନା ଥିଲା ଆନନ୍ଦ ଉତ୍ସାହ ନା ଉଦ୍ଦୀପନା

ସମୟ ବଦଳିଥିଲା ବର୍ଷ ତାରିଖ ସହ କ୍ୟାଲେଣ୍ଡର ମଧ୍ୟ

ଶୀତ ପ୍ରଭାବରେ ମୁହଁରେ ଟିକିଏ ବି ମଳିନତା ନଥିଲା

କିନ୍ତୁ ପ୍ରସନ୍ନତା କେଜାଣି କୋଉଠି ଉଭେଇ ଯାଇଥିଲା

ସଭିଙ୍କ ଭିତରେ ବ୍ୟସ୍ତ ମୁଁ

ମନରେ ଅନେକ ଭାବନା କଳ୍ପନା

ସେହି ସ୍ୱତନ୍ତ୍ର ଭାବ ହଜିଯାଇଥିଲା

କିଛି ବି ନୂତନତା ନଥିଲା

ନା ଗେଣ୍ଡୁର ବାସ

ନା ଗୋଲାପର ହସ

ନା ଶୁଭେଚ୍ଛା ବାର୍ତ୍ତା

ନା ଦୁଇ ପଦ କଥା

ନା ଫୁଲରେ ନା ପତ୍ରରେ

ନା ହୃଦୟ ଭିତରେ

ପୌଷ ଏଇ ଶୀତ ସକାଳରେ

ପାଗ ମେଘୁଆ ଥିଲା

ଏମିତିରେ ଦିନ ବିତିଗଲା ସନ୍ଧ୍ୟା ବିତିଗଲା

ଶୋଇବାର ଠିକ୍ ପୂର୍ବରୁ ମହକିଗଲା 

ଅତୀତର ମଉଳା ଫୁଲ

ବାସ୍ନାମୟ ମୋ ଚତୁଃପାର୍ଶ୍ଵ

ମୁଁ ଉଦବିଗ୍ନ ଉଦାସ

ଆଗକୁ ବଢ଼ିବା ପାଇଁ ଅତୀତକୁ

ପାଶୋରି ଦେବା ହିଁ ଶ୍ରେୟ

ଝରା ଫୁଲର ବାସ୍ନାରେ

ମୋହିତ ହେଲେ କି ଲାଭ

ଚାପିଦେଲି ବନ୍ଦ ଡାଏରୀ ଭିତରେ 

କିଛି ଅବଶୋଶ କିଛି ଆଶା

କିଛି ନୀରବ ଅଭିଯୋଗକୁ ନେଇ ଶୋଇବାକୁ ଚେଷ୍ଟା କଲି

ନା ମନ ବୁଝିଲା ନା ନିଦ ଆସିଲା

କିଛି ନୂଆ ନୁହେଁ

ଅଳ୍ପରେ ଅଳ୍ପରେ ଏମିତି ହିଁ ମୋ ନୂଆବର୍ଷ ଥିଲା।