ମୋ ଝିଅ ବଡ଼ ହେଉଛି

ଓଢଣୀ କଣ୍ଢେଇ ଧରି ଆଉ ସେ ଖେଳୁନି

ଆଇନା ଦେଖିକି ହସୁଛି 

ମୋ ଝିଅ ବଡ଼ ହେଉଛି ।।୧।।

ଅଝଟିଆ ମୁହଁ ତାର ଆଉ ଅଝଟ କରୁନି

ସେ ମୁହଁ ଲାଜ କରୁଛି 

ମୋ ଝିଅ ବଡ଼ ହେଉଛି ।।୨।।

ସ୍କୁଟି ଚଢି ଝିଅ ଗଲାଣି ମୋହର

ତା ସାଇକଲ ଦେଖି ମୁଁ ଭାବୁଛି

ମୋ ଝିଅ ବଡ଼ ହେଉଛି।।୩।।

କଥା କହି ଯିଏ ଘର ଉଠାଇଥିଲା

ଆଜି ଚୁପ୍ ଚାପ୍ ସିଏ ରହୁଛି

ମୋ ଝିଅ ବଡ଼ ହେଉଛି ।।୪।।

ସଢେଇ ଖେଳ ଛାଡ଼ି ଏବେ ଝିଅ ମୋର

ମୋବାଇଲ ଧରି ବସୁଛି

ମୋ ଝିଅ ବଡ଼ ହେଉଛି ।।୫।।

କଥା ପଦିଏରେ ବୁଝି ଯାଉଥିଲା

ଆଜି ଜିଦି କରି ସିଏ ବସୁଛି

ମୋ ଝିଅ ବଡ଼ ହେଉଛି ।।୬।।

ଅଭିମାନେ ମୁହଁ ଫୁଲାଉନି ଆଉ

କଥାରେ ଜବାବ ଦେଇଛି

ମୋ ଝିଅ ବଡ଼ ହେଉଛି ।।୭।।

ତା ପିଲାଦିନ ମୋ ଆଖି ଆଗରେ

ଆଜି ପରା ନାଚି ଉଠୁଛି

ମୋ ଝିଅ ବଡ଼ ହେଉଛି ।।୮।।