ମଣିଷ ଜୀବନ

ମଣିଷ ଜୀବନ ନୁହଁଇ କେବଳ

ଜନ୍ମ ମରଣ ସଂସାର ।

ମଣିଷ ଜୀବନ ଦୁର୍ଲ୍ଲଭ ଜନମ

ଶ୍ରେଷ୍ଠ ପ୍ରାଣୀ ସଂସାରର ।।୧

ନୁହେଁ ତା ଜନମ ଆହାର ମୈଥୁନ

ନୁହଁଇ ସେ ପଶୁ ଜାଣ ।

ମଣିଷ ଜୀବନେ ବହୁଜନ୍ମ ପୁଣ୍ୟେ

ଲଭଇ ସେ ପିଣ୍ଡ ପ୍ରାଣ ।।୨

ମଣିଷ ଜୀବନ ନୁହଁଇ କେବଳ

ପରିବାର ନିଜ ପାଇଁ ।

କୀଟ ରୁ ପତଙ୍ଗ ପଶୁରୁ ଜଳଜ

ସଭିଙ୍କର ହିତ ପାଇଁ ।।୩

ମଣିଷ ଜୀବନ ଦୁଇଦିନ ପ୍ରାଣ

ପ୍ରଶ୍ୱାସେ ନାହିଁ ବିଶ୍ୱାସ ।

ଚାଲୁ ଚାଲୁ ଏଠି ପାଦ ଖସି ଯାଏ

ପ୍ରାଣ ହୋଇଯାଏ ଶେଷ ।।୪

ଅଢେଇ ଦିନର କୁଣିଆ ମଣିଷ

ଦୁନିଆ ଟା ରଙ୍ଗ ମଞ୍ଚ ।

ଅଭିନୟ ସାରି ବାହୁଡ଼ି ଆସଇ

ରହିଥାଏ ଯଶ ଛାଞ୍ଚ ।।୫

ମଣିଷ ଜୀବନ ନୁହଁଇ କେବଳ

ବର୍ଷ ମାସ ଦିନ ଦଣ୍ଡ ।

କର୍ମେ ଏଠି ନର କର୍ମ ବଳେ ତାର

ପାଲଟି ଯାଏ ସେ ଷଣ୍ଢ ।।୬

ମଣିଷ ଜୀବନ ନୁହଁଇ କେବଳ

ଅର୍ଥ ହାସଲ ସଂସାର ।

ଯଶ ରଖିଗଲେ ମଣିଷ ଜୀବନେ

ହୋଇଯାଏ ସେ ଅମର ।।୭

ମଣିଷ ଜୀବନ ନୁହଁଇ କେବଳ

ତେଲ ଲୁଣ ଚା ସଂସାର ।

ପାଇଁ ଜନ୍ମ ଭୂମି ସେବା ମାତୃକାର

ଜନମ ନର ଆମର ।।୮

ଆମ ଭିତେ ଅଛି ସହସ୍ର ବଳ ଯେ

ଅଛି ତେଜ ସୁଦର୍ଶନ ।

ଓଡ଼ିଆ ଜାତିର ଟେକ ରଖିଗଲେ

ହୋଇବ ଜାତି ମହାନ ।।୯