ମଜା..ମଜା

ଖରାର ମଜା ଶୀତରେ

ବାଜାର ମଜା ଗୀତରେ

ପୁଷିର ମଜା ମାଛ ଶୁଖୁଆରେ

ଖୁସିର ମଜା ଚିତ୍ତରେ । ।

ଫୁଲର ମଜା ଗଭାରେ

ତାଳିର ମଜା ସଭାରେ

ପାନର ମଜା ପାକୁଆ ପାଟିରେ

ଦାନର ମଜା ଦବାରେ । ।

ଲିଆର ମଜା ଦହିରେ

ଜୀଇବା ମଜା ମହୀରେ

କବିର ମଜା କବିତା ଲେଖାରେ

ଛବିର ମଜା ବହିରେ । ।

ହନୁର ମଜା ଡାଳରେ

ଭିକର ମଜା ଥାଳରେ

ଖଡାର ମଜା ବଡି ବେସରରେ

ନଡାର ମଜା ଚାଳରେ । ।

ମାଳାର ମଜା ଗଳାରେ

ହାଣ୍ଡିର ମଜା ମଳାରେ

ନଳାର ମଜା ମଳ ବୋହିବାରେ

ହଳାର ମଜା ଖଳାରେ । ।

ନୋଳିର ମଜା କାନରେ

ଚଷୁର ମଜା ଧାନରେ

ଛୁଆର ମଜା ମାଆର କୋଳରେ

ଗୁଆର ମଜା ପାନରେ । ।

ଡାଲିର ମଜା ଭାତରେ

ମୂଷାର ମଜା ଗାତରେ

ଝୁଲିବା ମଜା ଝୁଲଣ ଦୋଳିରେ

ବୁଲିବା ମଜା ଯାତରେ । ।

ପୁରର ମଜା ମଣ୍ଡାରେ

ସୂତାର ମଜା କଣ୍ଡାରେ

ପାଠର ମଜା ପଢ଼ାବେଳେ ଯେବେ

ମନଟି ଥାଏ ଥଣ୍ଡାରେ । ।

* - * - * - * - * - * - *