ମିତା ଓ ଟିକି ଚଢେଇ

ମିତା ଡାକିଲା ଆକାଶେ ଚାହିଁ 

      ଆ' ରେ ଆ' ଟିକି ଚଢେଇ 

ହୋଇବା ଆମେ ସାଙ୍ଗ,

      ବୁଲିବା ବଣ ପାହାଡ ନଈ

      ତୋଳିବା ଫୁଲ ବଗିଚା ଯାଇଁ

ନାଲି ନେଳିଆ ରଙ୍ଗ ।

ଖେଳିବା ଖେଳ ଜାତି ଜାତିକା

      ତୋଳିବା ଘର ସତସତିକା

କାଠି କୁଟାକୁ ଆଣି,

      ଯିବାରେ ଆମେ ମାମୁଁ ଘରକୁ

      କହିବା ଯାଇଁ ଅଜା ଆଈଙ୍କୁ

ଦେବେ କଣ୍ଢେଇ କିଣି ।

ତୋଅର ପୁଅ ମୋଅର ଝିଅ

      ହସ ଖୁସିର ଝରିବ ସୁଅ

କଣ୍ଢେଇ ବାହାଘର,

      ରାନ୍ଧିବା ଭାତ ଡାଲି ତିଅଣ

      ପରଶି ଦେବା ଜଣକୁ ଜଣ

ମିଳିବ ଉପହାର ।

ଉଠିବା ଆମେ ସକାଳୁ ନିତି

     ଧରିବା ଯାଇଁ ପରଜାପତି

ଗାଇବା ଆମେ ଗୀତ,

     କହିବା ନାହିଁ ଟିକିଏ ମିଛ

     ରଖିବା ପରିବେଶକୁ ସ୍ବଚ୍ଛ 

ହେବାରେ ଆମେ ମିତ ।

ଶୁଣିଲା ସବୁ ଟିକି ଚଢେଇ 

     ହରଷେ ଦେଲା ମୁଣ୍ଡ ହଲାଇ 

ଆକାଶେ ଉଡିଗଲା,

     କହିଲା ସାଙ୍ଗ- ଯାଉଛି ଚାଲି

     ପାହିଲେ ରାତି ଆସିବି କାଲି

ମିତା ତ ଚାହିଁଥିଲା ।