ମହାତ୍ମା ଗାନ୍ଧୀ

ପିତା କାବା ଗାନ୍ଧୀ ମାତା ପୁତୁଲିଙ୍କ

ସୁଯୋଗ୍ୟ ସନ୍ତାନ ତୁମେ,

ଭାରତ ମାତାର ଅମୃତ ସନ୍ତାନ  

ବିଖ୍ୟାତ ମୋହନ ନାମେ |

ଜାତିର ଗରବ ଗଉରବ ତୁମେ 

ସତ୍ୟ ଧର୍ମ ନ୍ୟାୟଧାରୀ,

ତଡିଲ ଫିରିଙ୍ଗି ଆମରି ଦେଶରୁ

ଅହିଂସାକୁ ଅସ୍ତ୍ର କରି |

ଜାତିର ଜନକ ହେ ପୂଜ୍ୟ ବାପୁଜୀ

ଧନ୍ୟ ତୁମ ବଳିଦାନ,

ଦେଶ ମାତୃକାର ସେବାରେ ନିଜକୁ

କରିଦେଲ ସମର୍ପଣ |

ବାକ୍ୟବୀର ନୁହଁ କର୍ମବୀର ବୋଲି

କହିବା କାର୍ଯ୍ୟ ଦେଖାଅ,

ସମୟ ଜ୍ଞାନକୁ ସୂଚାଇବା ପାଇଁ

ଘଣ୍ଟାକୁ ଅଣ୍ଟାରେ ବାନ୍ଧ |

ହେ ମହାତ୍ମା ତୁମେ ଶାନ୍ତିର ପ୍ରତୀକ

ସାବରମତୀ ସାଧକ,

ତ୍ରିରଙ୍ଗା ପତାକା ଉଡାଇ ଦେଶରେ,

ରଖିଲ ଜାତିର ଟେକ |

ସମଗ୍ର ପୃଥିବୀ ଗାଉଅଛି ଆଜି  

ତୁମରି ବିଜୟ ଗାଥା,

ଧନ୍ୟ ତୁମ ତ୍ୟାଗ ଜାତୀୟତା ପ୍ରୀତି

ନଇଁଯାଏ ମୋର ମଥା |