ମାତୃ ପ୍ରେମ

ଅତି ସରାଗରେ   ଅତି ଜତନରେ

     ପାଳିଥିଲି କୋଳ କରି ,

ଜୀବନ ଯନ୍ତ୍ରଣା    ସବୁ ଭୁଲିଥିଲି

     ତୋ ଖୁସି କାମନା କରି ।

ତୋ ହସରେ ହସ  ତୋ କାନ୍ଦରେ କାନ୍ଦ

      ମିଳାଉ ଥିଲି ମୁଁ ଦେଇ ,

ମାଆ ଡାକ ତୋର  ମୁଖରୁ କେବଳ

     କର୍ଣ୍ଣ ଖୋଜେ ରହି ରହି ।

ଢଳ ଢଳ ତୋର     ସୁନିଳ ନୟନ

      ପଙ୍କଜ ସରସୀ ଜଳେ ,

ପରି ଲାଗୁଥିଲା     ନୀଳ ଗଗନ ର

      ଅକୁହା ବେଦନା ତଳେ ।

କ୍ରନ୍ଦନ ତୋହର     ବୁକୁରେ ଅନଳ

      ଢେଉ ଟିଏ କରିଦିଏ ,

ହିଆର ଗହ୍ବରୁ      ନିର୍ଝର ଝରରୁ

       ଲୋତକ ଝରାଇ ଦିଏ ।

ଛୋଟ ପତଙ୍ଗଟେ   ହୋଇ ବୁଲୁଥିଲୁ

       ପଣତ କାନିକୁ ଧରି ,

ପକ୍ଷ ଲାଗିଗଲା   ଡେଣାରେ ତୋହର

      ଦୁରେ ଫିଙ୍ଗି ଦେଲୁ ଧରି ।

ବାଇଆ ଧନରେ    ବାଇଆ ଧନ ମୋ

       ଖୁସିରେ ରହିଥା ତୁହି ,

ତୋହର ସଂସାର     ଆନନ୍ଦିତ ରହୁ

        କାମନା କରୁଛି ମୁହିଁ ।

ତୋହର ଯନ୍ତ୍ରଣା    ମୋହଠାରେ ମିସୁ

     ମୋହର ଖୁସି ତୋ ଠାରେ ,

ପ୍ରଭୁଙ୍କ ଚରଣେ      ଏତିକି ମାଗୁଣି 

      କରୁଛି ମୁଁ ବାରେ ବାରେ ।