ମାଆର ମଉଡ଼ ମଣି

ପତିତପାବନ ଉଡୁଛି ଶ୍ରୀକ୍ଷେତ୍ରେ

     ତ୍ରିରଙ୍ଗା ଉଡୁଛି

     ଭାରତ ବୁକେ ।

ପାହାଡ଼ ପ୍ରାନ୍ତର ଆକାଶ ସାଗର

     ଜାତୀୟ ସଙ୍ଗୀତ

     ସୁରେ ମହକେ ।।

ସୁନାର ଭାରତ  ଆମ ଆର୍ଯ୍ୟାବର୍ତ୍ତ

     ମେଲିଛି ଆଜି ତା'

      ରଙ୍ଗ ଓଢଣି ।

ସେଇ ଓଢଣିରେ ଝରଝର ଝରେ

     ଶାନ୍ତି ମୈତ୍ରୀ ପ୍ରୀତି

     ବିଶ୍ୱ କାହାଣୀ ।।

ଓଢଣି ନୁହେଁ ସେ ସୁନାର ତ୍ରିରଙ୍ଗା

     ମାଟି ମା' ଭାରତ

       ଶୁଭ ସନ୍ତକ !

ଚିର ବନ୍ଦନୀୟା  ସ୍ମୃତି ସ୍ମରଣୀୟା

      ଗର୍ବ ଗୌରବର

      ପୁଣ୍ୟ ପ୍ରତୀକ ।।

ଗୁରୁ ଗାମ୍ଭୀର୍ଯ୍ୟରେ ଉନ୍ନତ ମଥାରେ

      ଫରଫର ଉଡେ

      ବିଶ୍ୱ ଭାରତୀ ।

ଆକାଶ ବାହିନୀ,ସୈନିକ ସର୍ବାଗ୍ରେ

      ସମ୍ମାନ ଢାଳନ୍ତି

       ଫୁଲାଇ ଛାତି ।।

ଗଙ୍ଗା ଗୋଦାବରୀ ନର୍ମଦା କାବେରୀ

      ମେରୁ ମହାନଦୀ

      ଗାଏ ସଙ୍ଗୀତ ।

ସଙ୍ଗୀତ ନୁହେଁ ତ ସ୍ଲୋଗାନ୍ ଅମ୍ଳାନ

      ଭାରତ ମାଆର

      ଗୌରବ ଗୀତ ।।

ସହିଦ୍ ମାନଙ୍କ   ସ୍ବର୍ଣ୍ଣାଭ ସ୍ମୃତିରେ

       ଗଗନ ପବନ

       ମଧୁ ମୁଖର ।

ଏଇ ଓଢଣିର   ଟେକ ରଖିବାକୁ

     କେତେ ଯେ ଝରିଛି

       ନୟନ ନୀର ।।

ସବୁଜ କ୍ଷେତ୍ରରୁ ସଙ୍ଗୀତ ଝରୁଛି

     ଆନନ୍ଦ ଉଲ୍ଲାସେ

      ବନ ମୁଖର ।

ଆବାଳବୃଦ୍ଧଙ୍କ ଶିଶୁ କିଶୋରଙ୍କ

     ଆଖିର ଚହଟ

     କି ମନୋହର !!

ଯବାନ କିଷାନ  ମୁଖରୁ ନିସୃତ

     ଜନତା ବି ଗାଏ

     ବନ୍ଦେ ମାତରଂ ।

ସୁଜଳା ସୁଫଳା ଶୀତଳ ସମୀରେ

     ଜାତୀୟ ସଙ୍ଗୀତ

      ଚଳ ଚଞ୍ଚଳମ୍ ।

ହେ ପ୍ରିୟ ତ୍ରିରଙ୍ଗା ମୈତ୍ରୀରଙ୍ଗେ ରଙ୍ଗା

      ଗର୍ବ ଗୌରବର

      ସ୍ୱୟଂ ପ୍ରତୀକ ।

ମଥା ଟେକି ଆମେ ସମ୍ମାନ ଦେଉଛୁ

     ରଖି ଚାଲିଥିବୁ

     ତୁମରି ଟେକ ।।

ତିନୋଟି ରଙ୍ଗର ସମାହାର ନୁହେଁ

     ବିଶ୍ୱ ଇତିହାସେ

     ତୁମେ କାହାଣୀ ।

ଶତ୍ରୁ ଦଳନର   ଚଳନ୍ତି ପ୍ରତୀକ

     ଭାରତ ମାଆର

      ମଉଡ଼ ମଣି ।।