ମାଆ

ବାପା ନ ଥିବା ପୁଅ ସଭାରେ ହାରେ

ପଲ୍ଲୀ ସଭା ଅବା ଦିଲ୍ଲୀ ସଭାରେ

ମହକ ଥାଇ ଚହଟ ହଜେ

ବଣମଲ୍ଲୀ ପରି ବଣରେ ମରେ ।

ଜିତିବା ନିଶାକୁ ଆଖିରେ ଗଣ୍ଠେଇ

ମାନ ମହତ ହୁଏ ହରିଲୁଟ୍ ପଦାରେ ॥

ମା' ନ ଥିବା ଛୁଆ ପଣତ ଝୁରେ

ସ୍ନେହ ଅଣ୍ଡାଳେ ବାତ୍ସଲ୍ୟ ଖୋଜେ

ମମତା ଦର‍ାଣ୍ଡେ ଲୁହର ଧାରେ ।

ଶୂନ୍ୟ ହୃଦୟର ଦରଛିଣ୍ଡା ଚିତ୍ର

ଝାପସା ଦିଶେ ପୁଣି ଭଙ୍ଗା ପ୍ର‍ାଣରେ ॥

ରାସ୍ତାସବୁ ଲାଗେ ଆବୁଡା ଖାବୁଡା

ସ୍ୱପ୍ନସବୁ ପଥହୁଡା

ଇଚ୍ଛାତକ ଛନ୍ଦହୀନ; ଦିଗହରା ବେସୁରା

ଆଢୁଅ‍ାଳେ କୋହ ସବୁ ଫାଟି ପଡେ ଢୋ ଢା

ଯେମିତିକା ଫଗୁଣର ପତ୍ରଝଡା ।

ଝୁଣ୍ଟୁଥାଏ ଶୂନ୍ୟତାର ପଣତରେ

ଘରେ ଅବା ଅଗଣାରେ, ଦାଣ୍ଡ ଦୁଆରେ ॥

ଝୁରେ ବି ସେଇ 

ଶ୍ରଦ୍ଧାବୋଳା ମଧୁରିମା କୋଳ

ବାଇ ଚଢେଇର ବସା ପରି ଦୁର୍ଗମ୍ୟ

ଅଭେଦ୍ୟ ଅଥଚ କାନ୍ତ କୋମଳ

ଖରା ବର୍ଷା ଶୀତ କି

ଝଡ ଝଞ୍ଜା ବତାସର ନ ଥାଏ ଡର

ସେ କୋଳରେ ଝୁଲି ଦୋହଲି

ପାହୁଥିବ ସଞ୍ଜ ଓ ସକାଳ ॥

ଝୁରେ ବି ଆହୁରି

ପ୍ରଶାନ୍ତିର ଫୁଲଝରା ସ୍ପର୍ଶ

ଗୁହାଳରୁ ଗୋବର ସାଉଁଟି

ପାଉଁଶରେ ବାସନ ମାଜି ଅବା

କାଦୁଅ ଭର୍ତ୍ତି କ୍ଷେତରେ ଘାଣ୍ଟି ଚକଟି

ହୋଇପାରେ ପାପୁଲି ସିଠା କର୍କଶ ।

ସେଇ ରୁକ୍ଷ ପାପୁଲିର ମୁଣ୍ଡ ଆଉଁସାରେ ଯେ

ସ୍ୱର୍ଗୀୟ ଉନ୍ମାଦ, ଅନୁପମ ଆହ୍ଲାଦ

ଯେବେ ଦେହ ବା ମନ

କ୍ଳେଶ କ୍ଳାନ୍ତି କି ରୋଗରେ ବିବଶ ॥

ମା' ପଣତ କୋଳ ମୃଦୁ ସ୍ପର୍ଶରେ

ପାରିଜାତ ଫୁଟେ ଶିଳାଶୃଙ୍ଗରେ

ମା' ନ ଥିବା ପିଲା ଜୀବନେ ହାରେ

ପ୍ରତି ମୁହୂର୍ତ୍ତରେ ପ୍ରତି ବାଜିରେ ॥॥॥