ମାଆ ଝଙ୍କଡ଼ ବାସିନୀ

କରୁଛି କରିବି ତଵ ସ୍ତୁତି ଗାନ

ସୁଲଳିତ ମଧୁଛନ୍ଦେ

ଲେଖୁଛି ଲେଖିବି ତଵ କଥାମୃତ

ନିରତେ ମୁଁ ଅପ୍ରମାଦେ l

ସଦା ପାଶେ ଥାଇ ଦିଅ ମା ବତେଇ

ସାହିତ୍ୟର ଶବ୍ଦାବଳୀ

ତଵ କରୁଣାରେ ଲେଖନୀ ମୋହର

ଦେଉଥାଉ ଶ୍ରଦ୍ଧାଞ୍ଜଳି l

ମୋ ହୃଦ ମନ୍ଦିରେ ରହି ସପ୍ରେମରେ

ଶ୍ରଦ୍ଧା ସିକ୍ତ ନୀର ସିଞ୍ଚି

ମୋ ପ୍ରାଣ ଶୀତଳ କରିଦିଅ ମା'ଗୋ

ଥିବା ଯାଏ ମର୍ତ୍ତେ ବଞ୍ଚି l

ପ୍ରତ୍ୟୁଷେ ପ୍ରଦୋଷେ ପ୍ରତି ମୁହୂର୍ତ୍ତରେ

ତୁମକୁ ସ୍ମରଣ କରି

ଚାଳିବି ଲେଖନୀ ସମାଜ ହିତରେ

ଯେତେ ବିପଦକୁ ବରି l

ସ୍ପଷ୍ଟ ହେଉ ମୋର ସୃଷ୍ଟିର ସମ୍ଭାର

ସତ୍ୟ ଶାନ୍ତି ଦେଉ ଭରି

ସମର୍ପିତ ସ୍ଵରେ ଡାକୁଛି କାତରେ

ପଡ଼ୁ ତବାଶିଷ ଝରି l

ସାମଗ୍ରିକ ସତ୍ତା କବିପ୍ରାଣ ବତ୍ତା

ତଵ ବିନା ସବୁ ବ୍ୟର୍ଥ

ଝଙ୍କଡ଼ ବାସିନୀ ବିଦ୍ୟା ପ୍ରଦାୟିନୀ

ଘେନ ମୋର ପ୍ରଣିପାତ l