ମାଆ ବିରଜା

  

ଭକ୍ତି ର ପ୍ରତୀକ  ଦେବୀ ଆଦି ମାତା

ତୁହି ଲୋ ବିରଜା ମା,

ତୋତେ ସଭକ୍ତିରେ  ଡାକିଦେଲେ ଥରେ

ସଦା ହୋଇ ଥାଉ ସାହା ।

ଯାଜପୁର କ୍ଷେତ୍ରେ  ଉଡ଼େ ତୋର ଧ୍ଵଜା

ବିରଜା ପୀଠ ଯେ କହି,

ମାତା ବୈତରଣୀ  ତୋ ପଦ ଧୋଉଛି

କୁଳୁ କୁଳୁ ଗୀତ ଗାଇ ।

ଜାଣି ନାହିଁ ସ୍ତୁତି  ପୂଜା ଆରାଧନା

ତୋର ଅବୋଧ ସନ୍ତାନ,

ନମି ପାଦ ପଦ୍ମେ  ପ୍ରଣତି କରୁଛି

ରଖ ମୋର ନିବେଦନ ।

ଆଦ୍ଯଶକ୍ତି ମାତା କି ଗୁଣ ଗାଇବି

କାହିଁ ଅବା ମୋର ଶକ୍ତି,

ଅଜ୍ଞାନ ଅନ୍ଧାର  ମୋ ଚକ୍ଷୁରେ ପୂର୍ଣ୍ଣ

ମୁଁ ପାମର ମୂଢ ମତି ।

ତୋର କ୍ଷେତ୍ର ଧୂଳି  ମୁଣ୍ଡେ ହୋଇ ବୋଳି

ଡାକୁଛି ପୟରେ ତୋର,

ସଭିଙ୍କ କଳସେ   ଭରିଦେ ଆଶିଷ

ଏତିକି ସୁଦୟା କର ।