ମା

ତୁମପାଇଁ ମାଆ ବସୁଧା ଚାହିଁଛି

            ଶେଫାଳିରେ ମଥା ବାନ୍ଧି,

ଆମେ କିନ୍ତୁ ମାଆ ଘରେ ରହିଅଛୁ

            ସତେ ଅବା ଗୃହ ବନ୍ଦୀ ।

ତୁମପାଇଁ ମାଆ ଚାମର ଢ଼ାଳୁଛି

             ନଦୀକୂଳେ କାଶତଣ୍ଡି,

ଆମେ କିନ୍ତୁ ମାଆ ବାହାରକୁ ଗଲେ

           ମୁଁହରେ ବାନ୍ଧୁଛୁ ତୁଣ୍ଡି ।

ସରୋବରେ କଇଁ ସରମରେ ନଇଁ

           ଜୋଛନାରେ ଯାଏ ଭିଜି,

ଏଠିକିନ୍ତୁ ଛୁଆ ଖୋଜେ ତାର ମାଆ

            ଲୁହ ସାଗରରେ ଆଜି ।

ତୁମକୁ ସ୍ୱାଗତ କରିବା ପାଇଁକି

            ଜହ୍ନ ହସେ ଆକାଶରେ,

ଛୁଅନ୍ତିନି କେହି କରୋନା ରୋଗୀକୁ

             ମରେ ଏଠି ଅକାଳରେ ।

ବଧୂଲି ତାହାର ନାଲିନାଲି ଓଠେ

            ଗାଏ ତୁମପାଇଁ ଗୀତ,

ବଧୂଟିଏ ଏଠି ସିନ୍ଦୁର ହରାଏ

           ଶୁଣିତାର ସ୍ୱାମୀ ମୃତ ।

ଜହ୍ନିଫୁଲ ଫୁଟି ଶୋଭା ପାଉଅଛି

             ତୁମ ଆଗମନୀ ପାଇଁ,

ଆମକୁଲାଗେସେ ଥଟ୍ଟା କରୁଅଛି

             କୁଆଁରୀ ମାନଙ୍କୁ ଚାହିଁ ।

କୁଆଁରପୁନେଇଁ ଆଗକୁ ଆସୁଛି

             ବଜାର ଯିବାକୁ ବାଧା,

ଗୁମୁରିଗୁମୁରି ମନେମନେ କାନ୍ଦେ

                 ଆଜିସେ କୁଆଁରୀ ରାଧା ।

ସ୍କୁଲ୍ ନଯାଇ ପାଠପଢ଼ା ନାହିଁ

               ବସିଛନ୍ତି ପିଲେ ଘରେ,

ସବୁଦୁଃଖ ମାଆ ଜଣାଇଲି ତୋତେ

               ବିଚାର କରିବୁ ଥରେ ।

ଆଶ୍ୱିନ ଆସିଛି ଆଶ୍ୱାସନା ଦେବ

               ଆଶାରେ ରହିଛୁ ଆମେ,

ଦୁର୍ଗତୀନାଶିନୀ ଆମକୁ ନିରାଶ

              କରିବନି କେବେ ତୁମେ ।