ମା'ଗୋ ସରସ୍ୱତୀ

ମା'ଗୋ ସରସ୍ବତୀ

ମା'ଗୋ ସରସ୍ବତୀ , କରୁଛି ବିନତି ।

ବାରେ ଦିଅ ଶାନ୍ତି ଲବେ ଭକ୍ତି ରତି ,

ମା'ଗୋ ସରସ୍ବତୀ ....( ଘୋଷା )

କରୁଣା ହେଲେ ଛାର ଅନ୍ଧକାର ହେବ ଦୂର

ଫୁଟିବ କଣ୍ଠେ ମୋର ସୁମଧୁର ଭାବଗୀର ।

ଲିଖନ ଶକ୍ତି ସାର ହେବ ମୋର ଖରତର

ଶବଦ ପାରାବାର ବାରମ୍ବାର ହେବି ପାର ।

ତୁମ୍ଭ ପାଦେ ମତି ଅନୁନୟ ନିତି ,

ମା'ଗୋ ସରସ୍ବତୀ ....।

ତୁମ୍ଭଙ୍କୁ କରି ସ୍ତୁତି ବାଲମିକୀ ମହାଯତୀ

ଶ୍ରୀରାମ ନାମ ଚିନ୍ତି ପାଇଲେ ପରମଗତି ।

ଅଧମ ମୂଢ଼ମତି କାଳିଦାସ କଲେ ଭକ୍ତି

ଅଚିରେ ରଖି କୀର୍ତ୍ତି ରଚିଗଲେ କାବ୍ୟଗୀତି ।

ଜାଣେ ନାହିଁ ଭକ୍ତି ଚରଣରେ ପ୍ରୀତି ,

ମା'ଗୋ ସରସ୍ବତୀ ....।

ଶାରଳା ଶୂଦ୍ରମୁନି ତୁମ୍ଭ ପ୍ରୀତି ଭକ୍ତି ଜାଣି

ଲେଖିଲେ ଭାବେ ପୁଣି ମହାଭାରତ ବଖାଣି ।

ଗୀତ ଗୋବିନ୍ଦ ବାଣୀ ଜୟଦେବ ଗଲେ ଭଣି

ଗଢିଛ ବୀଣାପାଣି ମହାରତ୍ନ ଯେତେ ଜ୍ଞାନୀ ।

ଦିଅ ଅନୁମତି ଲେଖିବା ଶକତି ,

ମା'ଗୋ ସରସ୍ବତୀ ....।

ଲଭିଲେ ତୁମ୍ଭ ବର ପଞ୍ଚସଖା ଭକ୍ତବର

ଆବର ଭଞ୍ଜବୀର ଦୀନକୃଷ୍ଣ ଗଙ୍ଗାଧର ।

ଝଙ୍କାର ସପ୍ତ ସ୍ବର ତାନ ଲୟ କଣ୍ଠେ ଯା'ର

ଗାୟନେ ସଙ୍ଗୀତର ସୁମଧୁର ଏ ସଂସାର ।

ବିଦ୍ୟା ବୁଦ୍ଧି ଦାତ୍ରୀ ସ୍ଥିର କର ମତି ,

ମା'ଗୋ ସରସ୍ବତୀ ....।

ପ୍ରସନ୍ନ କୁମାର ମାଦଳା