ଲୁହରେ ଲେଖୁଛି ଚିଠି

ଲୁହରେ ଲେଖୁଛି   ଚିଠିଟେ ଦେଉଛି

      କରିବନି ମୋତେ ପର

କାଲିଥିଲି ତୋର    ଅତି ଆପଣାର

      ହୋଇଗଲୁ ଆଜି ଦୂର ।୧।

ଅନ୍ତର ବେଦନା   ସହି ମୁଁ ପାରେନା

      ମନେ ପଡୁ ତୁହି ଖାଲି

ମନେମନେ ତୋତେ   ଖୋଜୁଅଛି କେତେ

      କାହିଁକି ଗଲୁ ତୁ ଭୁଲି  ।୨।

ତୋ ପରି ଭଉଣୀ   କେତେ ଖୋଜିଲିଣି

       ଏ ଜଗତେ ମିଳୁ ନାହିଁ

ସ୍ନେହ ଶ୍ରଦ୍ଧା ତୋର   ଅଛି ମନେ ମୋର 

       କହୁଛି ପ୍ରଭୁଙ୍କୁ ଚାହିଁ ।୩।

ମୋ ପରି ଭାଇକୁ   ଫିଙ୍ଗିଣ ଦୂରକୁ

      କେମିତି ପାଉଛୁ ଶାନ୍ତି  

ଜୀବନରେ ଦିନେ  ଦେଖିବି ନୟନେ 

      କରନି ମନ ଅଶାନ୍ତି ।୪।

କେଉଁ ଦୋଷ ଦେଖି   ଗଲୁ କଳାମାଖି 

      ବୁଝାଇ କହିବୁ ମୋତେ

 କାନ୍ଦୁଛି ହୃଦୟ     ହେଲୁ ତୁ ନିର୍ଦୟ

     କେମିତି ଭୁଲିବି ତୋତେ । ୫।

ଦୂରକୁ ସୁନ୍ଦର   ପର୍ବତ ଶିଖର

    ପାଖକୁ ସୁନ୍ଦର କଇଁ

ଭଗ୍ନୀ ପାଶେ ଭାଇ  ଥିଲେ ସାଥୀହୋଇ

      ଆନନ୍ଦ ଆସିବ ଧାଇଁ ।୬।

କୁହ ହେ ଠାକୁର  କି ଦୋଷ ମୋହର

     କାହିଁକି ହେଲୁ ପଥର

କର ସମାଧାନ    ବୁଝାଇ ତା ମନ

     ଡାକିବେ ତୁମକୁ ନର ।୭।

ଏତିକି ପ୍ରାର୍ଥନା   କର ମୋର ଘେନା

      ଦିଅ ତା ଜୀବନେ ସୁଖ 

ହସିଉଠୁ ତାର    ସୁନାର ସଂସାର

     ନ ଆସୁ ଜୀବନେ ଦୁଃଖ ।୮।