ଲଲାଟ ଲିଖନ
ଲଲାଟ ଲିଖନ
ଲେଖାଅଛି ଯାହା ଲଲାଟ କାନ୍ଥରେ
ତାକୁ କେ କରିବ ଆନ
ଘଟିଛି ଘଟିବ ଭବିତବ୍ୟ ଯାହା
ଭାଙ୍ଗି ସବୁ ଅଭିମାନ ll
ଜାତ ହେଲେ ନିଶ୍ଚେ ମରଣ ହିଁ ଧ୍ରୁବ
ଏହା ହିଁ ବିଧି ବିଚାର
ବାପ ଥାଉ ଥାଉ ପୁଅ ଟଳିପଡେ
ନାହିଁ କିଛି ପ୍ରତିକାର ll
ଚଉଦ ବରଷ ବନବାସ ଗଲେ
ପୁରୁଷୋତ୍ତମ ଶ୍ରୀରାମ
ରାତି ପାହିଥିଲେ ରାଜା ହୋଇଥାନ୍ତେ
ଛାଡିଲେ ଅଯୋଧ୍ୟା ଧାମ ll
ଲେଖାଥିଲା ପୁଣି ପାଣ୍ଡବଙ୍କ ହସ୍ତେ
କୌରବ ହୋଇବେ ହତ
ଧ୍ଵସଂ ହୋଇଗଲା ଧ୍ରୁତରାଷ୍ଟ୍ର ପଣ
ଏହା ହିଁ ମହାଭାରତ ll
ଦ୍ଵାପର ଯୁଗରେ ପାଞ୍ଚିଥିଲା କଂସ
ମଞ୍ଚାରୁ ଠେଲିବ କୃଷ୍ଣ
ଆପଣା ଫନ୍ଦାରେ ନିଜେ ଗଲା ଫସି
ଅହଂକାର ହେଲା କ୍ଷୁର୍ଣ୍ଣ ll
ପତ୍ନୀ ପୁତ୍ର ବିକି ହରିଶ୍ଚନ୍ଦ୍ର ରାଜା
ଜଗିଲେ ଶ୍ମଶାନ ଘାଟ
ଘୋଡା ପାଇଁ ଘାସ କାଟିଥିଲେ ନଳ
ହୋଇ ଜଣେ ବି ସମ୍ରାଟ ll
କାଳ ବହିଯାଏ ଆପଣା ବାଟରେ
କାହାକୁ ନାହିଁ ଅପେକ୍ଷା
ଜଗତର ନାଥ ପ୍ରଭୁ ଜଗନ୍ନାଥ
ସଭିଙ୍କୁ କରନ୍ତୁ ରକ୍ଷା ll