ଲକ୍ଷ୍ୟଭେଦ
ଲକ୍ଷ୍ୟଭେଦ
ଲକ୍ଷ୍ୟଭେଦ କରି ଯିବ ପଛେ ସରି
ତୂଣୀରରୁ ମୋର ଶର
ହାରିବାର ଅର୍ଥ ହେବନାହିଁ ବ୍ୟର୍ଥ
ପୁନଶ୍ଚ ଧନୁଷ ଧର ।
ନିରାଶା ଅତୀବ ସର୍ବଦା ନଥିବ
ପାହିବ ଅନ୍ଧାର ରାତି
ଭାଗ୍ୟ ହେଲେ ଉଦେ ଜୀବନର ଯୁଦ୍ଧେ
ଲଭିବ ବିଜୟ ଖ୍ୟାତି ।
ଜୀବନ ଏ ନାହିଁ ଟଳିଯିବା ଚାହିଁ
ପରାଜୟେ ନୋହୁ ଭ୍ରମ
ସ୍ଥିର ଥାଅ ତୁମେ ଲଢ଼ି ରଣଭୂମେ
ଭୁଲନି ନିୟମ ଯମ ।
ହାରିବାର ଭୟ ଦେଇଛିକି ଜୟ
ଦୁର୍ଗମ ସଂସାର ବାଟେ
କହ କିବା ଜାଣି ଦେଖିଲେ ମଶାଣି
ଭୟରେ ମୂର୍ଦ୍ଧନା ଫାଟେ ?
ଜୀବନର ବତି ପ୍ରଭାହୀନ ଅତି
ଇନ୍ଧନ ହୁଅନ୍ତେ ଶେଷ
ନିଃଶ୍ବାସର ବାତେ ଲିଭେ ସାଥେସାଥେ
ଅନ୍ୟଥା ନୁହଁଇ ଲେଶ ।
ନିଜ ଗର୍ଭେ ଚାହିଁ ଲିଭେ କିଏ କାହିଁ
ଊର୍ଦ୍ଧ୍ବକୁ ଯାହାର ଲକ୍ଷ୍ୟ
ତଳେ ଥିବା ଛାଇ ଭୁଲି ଜଳୁଥାଇ
ତତାଇ ଆପଣା ବକ୍ଷ ।
ଯୁଝିବାର ଧର୍ମ ବୀର ଯୋଦ୍ଧା କର୍ମ
ସହଜେ ନଯିବା ହାରି
ବିଫଳତା ଥିଲେ ସଫଳତା ମିଳେ
ସମସ୍ୟା ହେଲେ ବି ଭାରି ।