ଲକ୍ଷ୍ମଣ ରେଖା

ଆଖିରେ ଭରିଛି    ଆଖିଏ ସପନ

    ଇସାରା ଦେଉଛି କହି

ପ୍ରଥମ ଦେଖାର   ପ୍ରଥମ ପ୍ରେମର

    ସମସ୍ତ ଲକ୍ଷଣ ଦେଇ ।।

ଛାତି ଅଣଦେଖା    କରଇ ରାତିକୁ

     ଛୁଇଁବାକୁ ମନା କରି

କହିବା କଥାକୁ   କୁହେଇ ଦିଏନି

    ଦୂରେଇ ରହୁଛି ଡରି ।।

ହୃଦୟ ଜଳୁଛି   ବିରହ ଅଗ୍ନିରେ

  କୋହ ପରେ ଉଠେ କୋହ

ଗୁମରି ଗୁମୁରି  କାନ୍ଦଇ ସପନ

   ଆଖିରେ ଆଖିଏ ଲୁହ ||

ନାଲି ଗୋଲାପଟା  ମଉଳି ଯାଉଛି

   ମନେ ଖରା ଡହ ଡହ

ସଭିଏଁ ଯାଆନ୍ତି  ଏକା କରି ଦେଇ

   ରହେ ସାଥୀ ଆଖି ଲୁହ||

ଆଶା ମରିଯାଏ    ଆତ୍ମହତ୍ୟା କରି

     ଭାବନା କାନ୍ଧାଏ ଶବ

ହାଟର ସଉଦା    ବାଟରେ ହଜଇ

     ଚୋରୀ ହୋଇଯାଏ ନିଦ ।।

ରାହା ଖୋଜୁ ଖୋଜୁ   ସାହା ହଜିଯାଏ

     ସମୟ ରହଇ ଏକା

ନିଶ୍ବାସ ଚାଲଇ     ବିଶ୍ଵାସକୁ ନେଇ

     ଆଗରେ ଲକ୍ଷ୍ମଣ ରେଖା ।।

ବାଏ ଶୁଭୁଥାଏ    ହାଏ ଲୁଚିଯାଏ

     ଧୀରେ ଧୀରେ ପବନରେ

ଲକ୍ଷ୍ମଣ ରେଖା ମୋ   ଦୁଃଖ ହେଇଯାଏ

    ଡେଇଁ ହୋଇଯିବା ଡରେ ||