କୁହୁକ ବାସ୍ତବବାଦର ଖଦ୍ୟୋତ

ଶେଷ ଇଛା ଆଜି ଅଛି ଖଦ୍ୟୋତର

ଶୀତଳ ଆଲୁଅ ବିଞ୍ଚିଦେବ

ଏକ ସମୟରେ

କି' ବୁଢା, କି' ପିଲା ଅବା ଯୁବା

ଏକ ସମୟରେ ସମସ୍ତେ ହେବେ ଆଲୋକିତ ।

କାହାଣୀର ପ୍ରାଚୀନତାକୁ ଦେବ ଯୌବନ

ଦେଖେଇବ ତା ଦେହେ ବାଲ୍ୟ ଆଉ ବୃଦ୍ଧାଶ୍ରମ

ଜାଦୁକର ପରି

ଘଟଣା ପ୍ରବାହ ସବୁକୁ ଜୀବନରେ

ଜୀବନକୁ ଘଟଣାବଳୀର କାହାଣୀରେ

ଐନ୍ଦ୍ରଜାଲିକର ମାୟା ପରଦାରେ

ତମକୁ କରିବ ମୋହ ଯୁକ୍ତ ।

କୌଶଳ ଏମିତି ଯେ

ସତ୍ୟର ସନ୍ଧାନରେ ତମେ ହେବ ବାଟବଣା

ସତ ଆଉ ମିଛର ଦୁନିଆକୁ ଯାଇ

ସ୍ଵପ୍ନର ବାସ୍ତବତାକୁ କରିବା ଗ୍ରହଣ

ଏମିତି ଏ ଆଲୁଅର ଶୀତଳତା

ଖଦ୍ୟୋତର ଇଛାକୁ କରିବା ପୂରଣ

ସିଦ୍ଧ-ମହାମନ୍ତ୍ର, କପଟୀର ଷଡଯନ୍ତ୍ର ସବୁକୁ

ମାୟା-ମୋହ-ମହିମାରେ କରିବ ବନ୍ଧନ

ସେଇ ବନ୍ଧନରେ ତମେ ନିଜକୁ କରିବ

ମନୋରଞ୍ଜନ ଓ ଜ୍ଞାନରଞ୍ଜନ ।

ତମେ ନିଶ୍ଚେ ବୁଝି ପାରିଥିବ

କୁହୁକ ବାସ୍ତବବାଦକୁ

ବାଦ ନୁହଁ କୁହୁକ ବାସ୍ତବତାକୁ

ଠିକ ଈଶ୍ଵରଙ୍କ ପରି

ତମେ ମାନି ପାର, ନ ମାନି ବି ପାର

ସତ କହୁଛି ଐନ୍ଦ୍ରଜାଲିକର ଜାଦୁ-ପରୀ ।

ପ୍ରକୃତି ଏ ସଂସାରରେ ସବୁକିଛି ସମ୍ଭବ

ସମ୍ଭବ-ଯୁଗସମ୍ଭବ

କୋଟିଏ ମଣିଷ ଭିତରେ ଏକ ସମୟରେ ସମ୍ଭବ

ସାଧୁ-ସଇତାନ ପୁଣି ମହାପୁରୁଷ

ଯେହ୍ନେ ମଧୁ-ମଦିରା ଜଳେ ବହୁଥାଏ ବିଷ ।

ସମାଜର ଭିନ୍ନ ଏକ ସ୍ଵାଦ-ଏକ ଭିନ୍ନ ଆସ୍ଵାଦ

ବିକାଶର ପେଟରେ ବିନାଶର ବିଶୁଦ୍ଧ ଚିତ୍ର

ସଂରଚନାର ନାଭି ମୂଳରେ

ସୃଷ୍ଟ ଏକ ମୃତ ବ୍ରହ୍ମାଣ୍ଡର ପରିକଳ୍ପନା,

ସବୁକିଛି ସମ୍ଭବ

କୁହୁକତାର ସଂସାରରେ

'ଶେଷ ଇଶ୍ଵର' ପୁଣି 'ଶେଷ ତାନ୍ତ୍ରିକର ସନ୍ଧାନରେ'

ପରୀ କଥା-ଶକ୍ତିମାନ ଆହୁରି ଅନେକ ସିରିୟଲରେ ।

କୁହୁକତା ବି ବାସ୍ତବ ଏ ଜୀବନର କଥା କୁହେ

ଖଦ୍ୟୋତକୁ ପ୍ରତିଶ୍ରୁତି ଦିଏ

ହସ-କାନ୍ଦ ଦୁନିଆର ମିଛୁଆ ସତକୁ

ନୀଳ ଆଲୋକର ଶୀତଳତାରେ ସଭ୍ୟ କରାଏ

ସ୍ଵପ୍ନର ରାଈଜରେ

ଇଛା-ଗୋଦାମର ଶୀତଳ ଆଲୁଅରେ

ବାସ୍ତବ ଜୀବନରେ

ସବୁକିଛି ସମଭାବ-ସମ୍ଭଵର ମହାମନ୍ତ୍ର ନେଇ

ଘନ ଅନ୍ଧାରରେ

ଖଦ୍ୟୋତ ବି ବାଟ କଢାଏ ।