କରୋନା ବେମାର୍'କେ ହରେଇ

କରୋନା ବେମାର୍'କେ ହରେଇ ଦେତି

ତତେ ଘାଏଁ ଦେଖି ଆଏତି,

ମାଁ'ଗୋ ତୋର୍ ପାଖେ ବସି

 ଦୁଇପଦ୍ କଥା ହେତି ।

ଆଏଜ୍ କିଛି ଭଲ୍ ନାଇ ଲାଗବାର୍

ମାଁ ତତେ ଖୁଜା ଲାଗୁଛେ,

ତୋର୍ କୁଲେ ଟିକେ ସୁଇ ପଡ୍'ତି

ହେନ୍ତା ଲେଖେ ଲାଗୁଛେ ।

ଭାଗି ଯାଏତି କାମ୍'ବୁତା ଛାଡି

 ମାଁ'ଗେ ପାସ୍'କେ ଦଉଡିକରି,

ଗେଲଟିକେ କରିଦେତୁ ମତେ

ପନତ୍'କାନୀ ଉଢେଇକରି ।

ଛଏରା ତଲେ ଢାପି ରଖ୍'ତୁ

ସୁଆଦ୍ ସୁଆଦ୍ କଥା କହି,

ତୋର୍ ହାତେ ଖୁଏଇ ଦେତୁ

ମୋର୍ ସୁନାଧନ୍ ଖାଏଦେ କହି ।

ବଡାଦିନ୍ ହେଲାନ ନୁହେ ଦେଖେ

ମାଁ'ଗୋ ତୋର୍ ସୁନ୍ଦରୀ ଚେହାରା,

ରହି ନାଇ ହେବାର ଆଏଜ୍ କେନ୍ତା ଯେ

ଲାଗୁଛେ କେତିନି କେତେ ନୁରା ।

ତତେ ସୋର୍ କରି,କରି ମାଁ'ଗୋ

ଆଖିର୍ ଲୁହୁ ଯାଉଛେ ଝରି,

ତୋର୍ ପାକ୍'କେ ଯିବାର୍'କେ ଚାହୁଛେ

କରୋନା ବେମାର୍'କେ ହରେଇ କରି ।