କରୋନା ବେଳେ କରୁଣା

ମୋଦି ସାଇଁ ତବ ନୀତି ଘାଇଁ ଘାଇଁ ଦେଶ ହିତେ ଜାରି ହେଲା 

କରୋନା ପାଇଁକି ୨୧ ଦିନ ଗୃହବନ୍ଦୀ ଦେଶେ ତାଲା ।

କଡାକଡି ଭାବେ ପାଳନ କରିବ ପ୍ରଶାସନ ଆଶା ରଖୁ

କରୋନାକୁ ଆମେ ନା ନା କହିବା କରୋନାଟି ପାନେ ଚାଖୁ ।

ବିମୁଦ୍ରୀକରଣ ଲୋମହରଷଣ ଦୁଃଖୀ ଦୁଃଖ ମନେପଡେ

ଏଟିଏମ୍ ରୁ ବାହାରେ ଦୁଇ ହଜାରିଆ ଚାହାକପେ ନାହିଁ ମିଳେ ।

ବାହାର ରାଜ୍ୟର ଦିନମଜୁରିଆ ଫସିଛନ୍ତି ଦେଶ ସାରା

ଟ୍ରେନ ବସ୍ ସବୁ ବାତିଲ୍ ହୋଇଲା କର୍ମ ଆଦରେ ବିଚରା !

ରାସ୍ତା କଡ ଯେତେ ବୁଲା ବେପାରୀଙ୍କ ଦୁଃଖ କିଏ ବା ବୁଝିବ 

ପରିବାର ତାଙ୍କ କିପରି ବଞ୍ଚିବେ ଭିକାରୀ କିସ କରିବ !

ପଦାକୁ ଗଲେ ସେ ମଜୁରୀ ଆଣନ୍ତି ନିତି ଖଟ ନିତି ଖାଅ 

ଏକୋଇଶ ଦିନ କିପରି ବଞ୍ଚିବେ ମୋଦି ସାଇଁ ତୁମେ କୁହ !

ମୁନିସିପାଲଟି ଗାଆଁ ପଞ୍ଚାୟତ ଦାୟିତ୍ୱ କି ନେବେ ତାଙ୍କ

ଘରୁ ବାହାରିଲେ ପୁଲିସ ପିଟିବେ କର୍ମ ହେବ ତାଙ୍କ ବାଙ୍କ ।

ପ୍ରଶାସନ ଥରେ ବସ୍ତିରେ ବୁଲିକି ହିସାବ ତାଙ୍କର ନେଉ

ରାସନ ପାଣିର ବ୍ୟବସ୍ଥା ତାଙ୍କର ଜନ ମଙ୍ଗଳରେ ହେଉ ।

ସାମ୍ବାଦିକ ଯେତେ ରାସ୍ତାରେ ବୁଲିକି ଟିଆରପି ଟାଣନ୍ତି ଭାରି

ତାଙ୍କ ଦୁଃଖ ଯଦି ନ ଦେଖିବେ କେହି ଅକାଳରେ ଯିବେ ମରି !

ସେଲିବ୍ରେଟି ଧନୀ କର୍ପୋରେଟ୍ ସଂସ୍ଥା ଯେତେକ ସମ୍ବାଦ ସଂସ୍ଥା 

ଦାନ ଦେଇ ତାଙ୍କ ଜୀବନ ବଞ୍ଚିବା କରନ୍ତୁ ଏବେ ବ୍ୟବସ୍ଥା। 

ଥିଲା ବାଲା ଯେତେ ପଡା ପଡୋଶୀର ଅଭାବୀ ମଣିଷ କଥା

କାମବାଲୀ ବାଇ ରୋଷେୟା ମାଳିଙ୍କ ଦୁଃଖକୁ ବୁଝନ୍ତୁ ଯଥା ।

ଆହୁରି କଥାଏ କହୁଛି କିଣିକି ଘରେ ନ ଭର ଗୋଦାମ 

କଳା ବଜାରୀଙ୍କୁ ମଉକା ମିଳୁଛି ଗରିବ କାହୁଁ ଆଣିବ !

ମିତ ବ୍ୟୟୀ ହୁଅ ଦେଶର ସମ୍ପଦ ସମସ୍ତେ ବାଣ୍ଟିକି ଚଳ

ବୁଲା ଗୋରୁଗାଇ କି ଦଶା ଭୋଗନ୍ତି ମାଙ୍କଡ ଯେ ତୀଥର୍ସ୍ଥଳ !

କରୋନା କୁ ଖାଲି ମାଡ ମାରିବାନି ମଣିଷ ପଣିଆ ହାରି

ପଡିଶାରେ କିଏ ମରି ପଡିଥିବେ ପଚି ଗନ୍ଧ ହେବ ଭାରି !