କୋଇଲି ପାରୁଡ଼ା ଆମ୍ବ ଲୋ

କୋଇଲି ପାରୁଡ଼ା ଆମ୍ବ ଲୋ...

ଦେହକୁ ଲଗେଇ ଗେଲ ହେଉଥିଲୁ

ଆଢୁଆଳ ଥିଲା ଖମ୍ବ !

ଶୁଖିଲା କଖାରୁ ଡଙ୍କ ଲୋ...

ଆଖିକୁ ମାରିକି ମୁହଁକୁ ମୋଡ଼ିକି

ସେଇତକ ଯାହା ରଙ୍କ !

ଚହଟ ମନ୍ଦାର ନାଲି ଲୋ...

ପାନଖିଆ ଓଠ ବାଦକି ପଡ଼ିବ

ବହଳିଆ ପ୍ରେମ ଖାଲି !

ଛନକା ମନକା ଛାତି ଲୋ...

ଚୋରା ପୀରତିରେ ଶରଧା ଏମନ୍ତ

ଅନ୍ଧାରକୁ ଛାଇ ହାତୀ !

ଜହ୍ନଠି ବଉଦ ଖଣ୍ଡେ ଲୋ...

ତୁଛାକୁ ହାତେର ଓଢ଼ଣା ପଡ଼ିଚି

ଦେଖିନାଇଁ ଜମା ଦଣ୍ଡେ !

ହାଟକୁ ବାଟକୁ ପାଆ ଲୋ...

ଲାଜକୁ ଏମିତି ମହତ କାଢୁଚୁ

ସିଆଣିରେ ପକା ନୂଆ !

ସାଧାରେ ଅଧାକୁ ଲାଖ ଲୋ...

ମନଟା ସାଗରେ ପୋଖରୀ ଅଣ୍ଡାଳି

ଦେଖାଉଛୁ ତୁଛା ସୁଖ !

ନହର କଣ୍ଟାରେ କାନି ଲୋ...

କେତେ ଶାଗ ମୁଗ ଅଣ୍ଟିରେ ପୂରାଇ

ମିଛୁଟାରେ ସାଜୁ ମୁନି !

ଧାନୁଆ ଲଙ୍କାର ପେନ୍ଥା ଲୋ...

ଘରକୁ ଝଅଟ ଆସିବୁ ଯେବେଟି

ସିନ୍ଦୂରିଆ ହେବ ସୁନ୍ଥା !