କୋଇଲି ବୈକୁଣ୍ଠ

ଲୀଳାମୟ ପ୍ରଭୁ ଜଗତର ନାଥ 

ଧନ୍ୟ ତୁମ ଲୀଳା ଖେଳା

ମାନବୀୟ ଲୀଳା ମର୍ତ୍ତ୍ୟେ କରୁଅଛ

ଧନ୍ୟ ପ୍ରଭୁ ଚକାଡୋଳା ll

ମହୋଦଧି କୂଳେ କଳ୍ପବଟ ମୂଳେ

ବିରାଜିଛ ଶ୍ରୀମନ୍ଦିରେ

ଭ୍ରାତା ଭଗ୍ନୀ ସାଥେ ବସିଅଛ ଦର୍ପେ

ରତ୍ନ ସିଂହାସନ ପରେ ll

ତୁମ କଳେବର କାଠର ବିଗ୍ରହ

ତା ମଧ୍ୟରେ ନାଭି ବ୍ରହ୍ମ

ଯେଉଁଠି ଜୀବନ ପରିତ୍ୟକ୍ତ କରେ

ଗୋଟେ ପରେ ଗୋଟେ ଜନ୍ମ ll

ନବ କଳେବର ହେଲେ ପ୍ରଭୁ ତୁମେ

ହୁଏ ତଵ ପୁନର୍ଜନ୍ମ

ଚତୁର୍ଦ୍ଧା ମୂରତି ଗଢ଼ା ବିଗ୍ରହ ରେ

ସଂସ୍ଥାପିତ ନାଭିବ୍ରହ୍ମ ll

ଜୀବ ବିନା ତଵ ପରିତ୍ୟକ୍ତ ଦେହ

କୋଇଲି ବୈକୁଣ୍ଠ ପୁରେ

ଅନ୍ତିମ ସଂସ୍କାର ସାଧିତ ହୁଅଇ

ମାନବୀୟ ବିଧାନରେ ll

ଶ୍ରୀମନ୍ଦିର କ୍ଷେତ୍ରେ ଦକ୍ଷିଣ ପଶ୍ଚିମେ

ନୈଋତ କୋଣରେ ଥାଇ

କୋଇଲି ବୈକୁଣ୍ଠ ପାଉ ଅଛି ଶୋଭା

ତୁମ ଲୀଳା ଖେଳା ନେଇ ll

ଜଗତ ଜନଙ୍କୁ ଦେଉଛ ସୂଚାଇ

ଦେବତା ବି ମୃତ୍ୟୁ ବରେ

ଜନମ ମରଣ ଚିରନ୍ତନ ସତ୍ୟ

ଏହି ମହୀ ମଣ୍ଡଳରେ ll

ଅଢ଼େଇ ଦିନର ଜୀବନ ଜୀଉଁଛ

ଅହଂ ଭାବ ତ୍ୟାଗ କରି

ଆନ ସେଵା ବ୍ରତେ ଉତ୍ସର୍ଗୀତ ହୁଅ

ହରି ନାମ ତୁଣ୍ଡେ ଧରି ll

ବିଶ୍ୱନିୟନ୍ତା ହେ ତୁମ ଆଦେଶରେ 

ଦିବସ ରଜନୀ ହୁଏ

ନିର୍ଦ୍ଦେଶରେ ତଵ ଯୁଗ ପରେ ଯୁଗ

ଆସି ପୁଣି ଚାଲି ଯାଏ ll