କିରି କିରି ଦେ ହସି

କିରି କିରି ଦେ ହସି

**************

କୁନୁମୁନିଆଁ ତୋ କାଉଁରି ମୁହଁରେ

ଡବ ଡବ ଦୁଇ ଆଖି,

କୁସୁମ କଳିକା ଓଠ ଦୁଇ ଧାରେ

ମିଠା ହସ ଥାଏ ଲାଖି I

ମନ ମାରି କାହିଁ ସକେଇ କାନ୍ଦୁଛୁ

ଆଲୋ ମୋ ଟୁଉକୁମୂଷି,

ରାଗ ରୂଷା ଭୁଲି ଆ ମୋ କୋଳକୁ

ସେନେହେ ଦେବି ଆଉଁସି I

ନୂଆ କୁଣ୍ଢେଇ ଟେ ଆଣି ଦେବାପାଇଁ

ରୂଷିକି ବସିଛୁ ଏଠି,

ତୋ ପାଇଁ ତ ମୀନା ବଜାର ଉଠେଇ

ଆଣିବିଲୋ ସୁନାନାକି I

ତୋ ଲୁହ ଝରିଲେ ଅନ୍ତରଟା ମୋର

ବତୁରି ବତୁରି ଯାଏ,

ସଂସାର ଯାକର ସୁଖ ଯେତେ ଧନ

ନିଗିଡ଼ିକି ବୋହିଯାଏ।

ଆସନ୍ତା ଛୁଟିରେ ବୁଲେଇ ନେବିଲୋ

ପୁରୀ ସମୁଦର କୂଳ,

ସେପାରି ଦେଖିବୁ ଆକାଶ କରୁଛି

ସାଗରକୁ କେତେ ଗେଲ I

ଲହରୀର ମାଳା ଠେଲାପେଲା ହୋଇ

ଖେଳୁଛନ୍ତି କେତେ ଖେଳ

ଖୁସିରେ ତୋ ପାଦ ଧୋଇଦେବା ପାଇଁ

ହେଉଛନ୍ତି ମାଡଗୋଳ I

ବଡ ଦେଉଳରେ ବଡ ଠାକୁରଙ୍କୁ

ଶକତ ମୁଣ୍ଡିଆ ମାରି,

ଆନନ୍ଦ ବଜାରେ ଖାଇବା ତୋ ପ୍ରିୟ

ଅବଢା ଓ ମିଠା ଡ଼ାଲି I

ଦିନେ ଯିବା ପଶୁ ଅଭୟାରଣ୍ୟ ସେ

ନନ୍ଦନକାନନ ବୁଲି,

କେତେ ଜାତି ପଶୁ ପକ୍ଷୀ ଦେଖି ମାମା

ଖୁସିରେ ନାଚିବୁ ଖାଲି I

ନିକୋ ପାର୍କ ଯାଇ ଖୁସିରେ ଝୁମିବୁ

ଖେଳି କେତେ ଦୋଳି ଖେଳ,

ପ୍ଲାନେଟୋରିଅମ ଭିତରେ ଦେଖିବୁ

ଗ୍ରହ ତାରାଙ୍କର ମେଳ I

ଦେଖେଇବି ଦିନେ ବୁଲେଇକି ତତେ

ପାରାଦୀପର ବନ୍ଦର,

ଜାହାଜ ମୁକୁଟ ପିଂଧିକି କେମିତି

ସୁନ୍ଦର ଦିଶେ ସମୁଦ୍ର I

ସରଗ ତାରା ମୋ ଦୁଃଖ ପାଶୋରା

ମୋ ଗଣ୍ଠିଧନ ଗଳାମାଳି,

ତୁଉ ମୁଁ ମିଶିକି ଖୁସିରେ ଖେଳିବା

ଏବେ ଟିକେ ଲୁଚକାଳି I

ରାଗ ରୁଷା ଛାଡି ମନ ଖୋଲି ଏବେ

କିରି କିରି ଦେ ହସି,

ସୁନେଲି ମୁହଁରୁ ହୀରାର ମୁକୁତା

ଝର ଝର ଯାଉ ଖସି I