କିଏ ସେହି

କିଏ ସେ ଦେଇଛି ଭେଟି

ସସାଗରା ଧରା, ସୂର୍ଯ୍ୟ ଚନ୍ଦ୍ର ତାରା

ଅପୂର୍ବ ସୁନ୍ଦର ସୃଷ୍ଟି ।

କେଉଁ ମନର କଳ୍ପନା

ଅନନ୍ତ ଶୂନ୍ୟରେ ଆଙ୍କି ଦେଇଅଛି

ମନୋରମ ଆଲିମ୍ପନା ।

କିଏ ସେହି ବିଶ୍ୱକର୍ମା 

ଗଢି ଦେଇଛି ଏ ସୁନ୍ଦର ପୃଥିବୀ

ଅନନ୍ୟ ଓ ଅନୁପମା ।

କାହା ଯାଦୁଗରୀ ସ୍ପର୍ଶ

ଏ ସାରା ଜଗତେ ମୋ ଦେଶକୁ

କରିଅଛି ସୁନ୍ଦର ସରସ ।

କାହାର ସେ କାରିଗରୀ

ନଦୀ ବନ ଗିରି ପାହାଡ ଝରଣା

ଦେଇଛି ମୋ ଦେଶେ ଭରି ।

କାହାର ଆଶିଷ ଧାରା

ଖରା ବର୍ଷା ଶୀତ ବସନ୍ତ ରୂପରେ

ଝରଇ ମୋ ଦେଶ ସାରା ।

କାହାର ଏ କରାମତି

କେହି ନୁହେଁ ଆଉ ସବୁରି ମୂଳରେ

ଜଗନ୍ନାଥ ଜଗତ୍ପତି ।