କି ଜୀବନ ସିଏ

କି ଜୀବନ ସିଏ ଯେଉଁଠାରେ ନାହିଁ

ଆନନ୍ଦ ବିଷାଦ ଦାଗ

ମେଘ ମହ୍ଲାରର ଶୀତଳ ପରଶ

ଉତ୍ତପ୍ତ ଦୀପକ ରାଗ l

ଜଳିନି ଯେଉଁଠି ବିରହ ନିଆଁରେ

ପ୍ରୀତି ପ୍ରଣୟର ଜୁଇ

ଶିହରିନି ତନୁ ମନ କେବେ ପୁଣି

ପ୍ରିୟାର ଚୁମ୍ବନ ପାଇ l

ଭଲପାଇବାର ସାଗର ବୁକୁରେ

ମିଶିନାହିଁ ପ୍ରେମ ନଈ

ପ୍ରିୟତମାର ସେ ଉଷ୍ଣ ନିଶ୍ବାସ

ପ୍ରିୟ ଦେହ ଛୁଇଁ ନାହିଁ l

ମନର ବଂଶୀଟା ଗାଇନାହିଁ କେବେ

ମିଳନର ମଧୁଗୀତି

ଭରା ଯଉବନେ ନିଃସଙ୍ଗ ଜୀବନ

ମନେ ଭରିନାହିଁ ତାତି l

ଯେଉଁ ଜୀବନରେ ମିଳିତ ହୋଇନି

ଜରାୟୁରେ ଗୁଣ ସୂତ୍ର

ଦୁର୍ଯ୍ୟୋଧନ ପରି ନାହିଁ ଯହିଁ ଶତ୍ରୁ

ସୁଦାମାର ପରି ମିତ୍ର l

ସିଏ କି ଜୀବନ ଯହିଁ ମିଳିଲାନି

ସମର୍ଥ ଗୁରୁଠୁଁ ପାଠ

ଚୌରାଶିଲକ୍ଷ ଯୋନିଚକ୍ରୁ ମୁକ୍ତି

ଜୀବ ପରମର ଭେଟ l