ଖଳତନ୍ତ୍ର
ଖଳତନ୍ତ୍ର
ଏକଥା ନୁହେଁ ଯେ ମନ୍ଦ କଥା ଆଉ
ପାରିବିନି ବୋଲି ଦେଖି
ପରନ୍ତୁ ଦେଖିଲେ ରାଜ ଦରବାରେ
ହୋଇଯିବି କାଳେ ସାକ୍ଷୀ ,
ଚିତ୍ରଗୁପ୍ତ ମୋର ସବୁ କଥା ନେଇ
ପଞ୍ଜିକାରେ ଦେଲେ ଲେଖି
କଥା ସରିଯିବ, ସେଥିପାଇଁ ଏବେ
ଫୁଟାଇ ଦେଲେ ମୋ ଆଖି ।
ମୂକ ପ୍ରାୟେ ମଣି ମୋହ ପ୍ରତି ଆଜି
ସଦୟ ହେଲେ କି ହେବ
ମନ୍ଦ କଥା ଯେତେ କହିବିନି ବୋଲି
ତମେ ସିନା ଭାବୁଥିବ ,
ତାଙ୍କ ବିରୋଧରେ ସ୍ବର ଉଠେ ଯଦି
କ୍ଷମତାଟି କିଏ ନେବ
ସେଥିପାଇଁ ପରା ଭାବି ଚିନ୍ତି ମୋର
କାଟି ନେଇଗଲେ ଜିଭ ।
ବଧିର ଭାବି କି ଅନୁଗ୍ରହ ଏତେ
ଉଚ୍ଚେ କର ଉଚ୍ଚାରଣ
କେବେ କିଛି ମୋର ଅଣ୍ଟିରେ ପୂରାଇ
କିପାଇଁ ହେ ଦିଅ ଦାନ ,
ହାଟରେ ବାଟରେ ପ୍ରଘଟ କରିଲେ
ସହନ୍ତେ କି ସେହି ଜନ
କଉଶଳେ ଦେଖ ନିବୁଜ କରିଲେ
ବିଣ୍ଡା ମାରି ଦୁଇ କାନ ।
ସ୍ବାର୍ଥବାଦୀଙ୍କର ଲାଭ ଖୋର ଏହି
ବେଉସା ତ ରାଜନୀତି
ଆଖି ପାଟି କାନ ବନ୍ଦ ଥିବା ଯାଏଁ
ଖଳତନ୍ତ୍ରେ ଯିବେ ଜିତି ।
ପ୍ରସନ୍ନ କୁମାର ମାଦଳା