କେତେ ପୂଣ୍ୟ ଥିଲା ଏଦିନ ତିଥିରେ

କେତେ ପୂଣ୍ୟ ଥିଲା ଏଦିନ ତିଥିରେ

ଆସିଲ ଜନମ ନେଇ

ଭାରତ ବର୍ଷକୁ ଦେଲ ତୁମେ ଦିଶା

ତୁମ ପରି ନେତା କାହିଁ

ହେ ବୀର ନେତାଜୀ କହିଗଲ ଗର୍ଜି

ରକ୍ତ ତୁମ ମୋତେ ଦିଅ

ତୁମ ସ୍ଵାଧୀନତା ତୁମକୁ ମୁଁ ଦେବି

ବୀର ବାକ୍ୟ ନିଃସନ୍ଦେହ।

ଦାମ୍ଭିକ ପଣରେ ମାଗିଥିଲ ରକ୍ତ

ଦେବା ପାଇଁ ସ୍ଵାଧୀନତା

ଚକିତ ହୋଇଲା ବିଶ୍ୱ ସମୁଦାୟ

ଉଦବୁଦ୍ଧ କଲା ବାର୍ତ୍ତା

ଉନ୍ମାଦ ଆଣିଲ ଭାରତ ଭୂମିରେ

ବିଦେଶ ମାଟିରେ ରହି

ଗଢିଲ ଆଜାଦ ହିନ୍ଦ ଫଉଜକୁ

ଫିରଙ୍ଗି ଡାକିଲା ତ୍ରାହି

ହେ ବୀର ସୁଭାଷ ହୋଇ ପରବାସ

ଦେଲ ତୁମେ ଯୁଦ୍ଧ ଗତି

ଦିଲ୍ଲୀ ଚଲୋ ଦେଲ ଡାକରା ଦୂରରୁ

ଥରିଗଲା ଶତ୍ରୁ ଛାତି।

ଗୋରା ଫୋଉଜର ହୁକୁମ ନମାନି

ଛାଡିଥିଲ ଦେଶ ମାଟି

ବହ୍ନି ଭାଷ ତୁମ ହେଲା ଅଗ୍ନି ସମ

ବିଦେଶ ଭରିଲା ମୁଠି

ଜାପାନ ଜର୍ମାନ ବରମା ରେଙ୍ଗୁନ

କେତେ କେତେ ଦେଶ ଜାତି

ଦେଖିଲେ ତୁମର ସାହସ ସଉର୍ଯ୍ୟ

କେତେ ଥିଲା ତୁମ ତାତି

ଦୁର୍ଘଟଣା ଦେଲା ଭିନ୍ନ ଭିନ୍ନ ମତ

ରହିଗଲ ଗୁପ୍ତ ହୋଇ

ନେତାଜୀ ନାମରେ ରହିଗଲ ତୁମେ

ନିନ୍ଦା ଯାର କେବେ ନାହିଁ ।

କେହି ଜାଣିଲେନି ତୁମ ଶେଷ କୃତ୍ୟ

କେତେ ଅବଶୋଷ ବୋହି

ଦେଶ ପାଇଁ ନିଷ୍ଠା ଦେଇ ଗଲ ଯାହା

କାଳ କାଳ ଗଲା ରହି

ଵଢାଇଲ ତୁମେ ଦେଶର ଗୌରବ

ନେତାଜୀ ଜଗତ ସାର

ସଲାମ କରୁଛୁ ଆଜିର ଦିନରେ

ସ୍ମରଣୀୟ ତୁମେ ଚିର।

ପ୍ରଶାନ୍ତ କୁମାର ହୋତା