କବି ଓ କବିତା

କବିର କବିତା କାବ୍ୟିକ ଚେତନା

ମିଳନ ମଞ୍ଜୁଳ ବାର୍ତ୍ତା

କବି ମାନସର ଆବେଗ ଆତୁର

ଐଶ୍ଵରିକ ପ୍ରାଣ ସତ୍ତା ll

କବିତାଟି ପରା କବି ହୃଦୟର

ପରିପୂର୍ଣ୍ଣ ରୂପକାନ୍ତି

ବେଦନା ବିଧୂର ଜୀବନର ସ୍ୱର

ପ୍ରୀତିଭରା ମୌନ ଜ୍ୟୋତି ll

କବି ପ୍ରାଣବହ୍ନି ଶୌର୍ଯ୍ୟ ବୀର୍ଯ୍ୟ ଅଗ୍ନି

ପ୍ରସ୍ଫୁଟିତ କବିତାରେ

ସୁମଞ୍ଜୁଳ ଭାଷା ସୃଷ୍ଟି ରେ ପରଷି

ହସି ଉଠେ ତୃପ୍ତି ଭରେ ll

ନିର୍ଲିପ୍ତ ନିଶୀଥେ ଭାଷା ସ୍ଵାକ୍ଷରରେ

ବିଭୋରିତ ଆତ୍ମା ପକ୍ଷୀ

ଅମୃତ ଦୁର୍ଲ୍ଲଭ ଛନ୍ଦମୟ ସୃଷ୍ଟି

ଇତିହାସ ଯା'ର ସାକ୍ଷୀ ll

ନୀଳ ନୟନାର ନିବିଡ଼ ଅଙ୍ଗନେ

ଘୋର ତମସାର କୋଳେ

କଳ୍ପନା ବିଳାସୀ କବି ଦେଖେ ସ୍ବପ୍ନ

କବିତା ପଂକ୍ତିର ମେଳେ ll

କବିତା ଜୀବନ କବିତା ମରଣ

କବିର ସେ ଗଣ୍ଠି ଧନ

ଲୋଡ଼ା ନାହିଁ ତା'ର ସପ୍ତ ଅଇଶ୍ଵର୍ଯ୍ୟ

କ୍ଷମତା ବା ଯଉବନ ll