କାଶତଣ୍ଡୀ
କାଶତଣ୍ଡୀ
ଧବଳ ହାସିନୀ ତୁହି କାଶତଣ୍ଡୀ
ଜମାଉ ଆସ୍ଥାନ ନଦୀ ପଠା ମଣ୍ଡି |
ଶୁଭ୍ର ଶରତର ଶୁଭ୍ର ସହଚରୀ
ଶୁଭ୍ର ଶର୍ବରୀଶ ସଙ୍ଗରେ ବିହରି |
ନିଜେ ଶୁଭ୍ର ଶୁଭ୍ରେ କରୁ ବିଚରଣ
ହଂସ ହଂସରାଳୀ ସାରସ ଗହଣ |
ପାରଦ ବିଧୌତ ରାକା ରଜନୀରେ
ବାତେ ବିଧୁନିତ ବିଷ୍ଣୁପଦ ନୀରେ |
ହିମ ସ୍ନାତ ନଦୀ ବାଲି ପଠା ବଣ
ଶରଦ ସୁନ୍ଦରୀ କରନ୍ତି ଭ୍ରମଣ |
ସବୁଜ ବସନେ ଧବଳ ଚାମର
ଚାଳୁ ପାର୍ବଣରେ ତୁହି ନିରନ୍ତର |
ଦେଵୀ ହୈମବତୀ ହୁଅନ୍ତି ପ୍ରସନ୍ନ
ପ୍ରତି ଅଵୟଵ ଶୋଭନ ପାବନ |
ମହିଷ ମର୍ଦ୍ଦିନୀ କେଶରୀ ବାହିନୀ
କଲେ ତୋତେ ଶ୍ୱେତ ଚାମର ଧାରିଣୀ |
ଅତି ମନୋହର ଅଟେ ତୋର ଶର
କରୁ ଉପକାର ତୁହି ଲୋକଙ୍କର |
ଆସନ ବିତାନ ସୌଖିନ ଖେଳନା
ତୋହରି ଶରରୁ ହୁଏ ସରଜନା |
ଶ୍ୟାମ କ୍ଷେତମାଳେ ତୋ ବର୍ଣ୍ଣିଳ ଗଭା
ସୁନୀଳ ସାଗରେ ସାଜେ ଉର୍ମି ପ୍ରଭା |
ତୋର ବୁଦା ମୂଳେ ରହନ୍ତି ବିଲୁଆ
କୋକି ବସା କରେ ସଙ୍ଗେ ଧରି ଛୁଆ |
କେତେ ବିହଙ୍ଗମ ନିଅନ୍ତି ଆଶ୍ରୟ
ସରୀସୃପଗଣ ରଚନ୍ତି ନିଳୟ |
ହୋଇ ତୃଣ ରାଜ ହସାଉ ଧରଣୀ
ଧନ୍ୟ ତୋ ଜୀବନ ଧନ୍ୟ ତୋ କରଣି |