କାଶତଣ୍ଡୀ କେରା କେରା
କାଶତଣ୍ଡୀ କେରା କେରା
ଶରତ ଆକାଶୁ ଜହ୍ନ ଅନେଇଛି
ନଈ ଆଇନାରେ ଚେହେରା ଦେଖୁଛି
ଛଳ ଛଳ ପାଣି ଚହଲା ଚହଲା
ଫୁଲ କାଶତଣ୍ଡୀ ଢେଉରେ ଦୋଳୁଛି।।
କାଶତଣ୍ଡୀ ଫୁଲ ଛଟକି ଫୁଲେଇ
ସଜାଡିଛି ଗଭା ଗଜରା ସଜେଇ
ଧୋବ ଫରଫର କେରା କେରା ତୋରା
ରୂପେଲି ରେଣୁରେ ଚନ୍ଦ୍ରିକା ତୋଳିଛି।।
ମତୁଆଲି ନଈ ହସି ରସି ବହେ
ଅଙ୍ଗ ବାସ ଝିନ ପାଟ ଖସି ଯାଏ
ନୀଳ ପଣତର ଧାରେ ଧାରେ ଅବା
ରୁପା ତାରକସି ଯତନେ ବୁଣିଛି।।
ଅବା ଶରତର ସ୍ୱାଗତ ଗୀତିକା
ତଟିନୀ ଗାଉଛି କଳ-କଳ ଏକା
କାଶତଣ୍ଡୀ ଫୁଲ ପାଶେ ପାଶେ ରହି
ଧବଳ ଚାମର ଆଲଟ କରୁଛି।।
ଅବା ଶାରଦୀୟ ଦେବୀ ଆଗମନୀ
ଗୀତିକା ଗାଉଛି ଅଧିରେ ଧରଣୀ
ଶୁଭ ଅଭ୍ର-ଶୁଭ୍ର ପୁଷ୍ପ ଗୁଚ୍ଛ ତୋଳି
କାଶତଣ୍ଡୀ ପୁଷ୍ପାଞ୍ଜଳି ଅରପୁଛି।।
ଆସ ମାଆ ଶାରାଦେ ଅଭୟ ଦାୟିନୀ
ଆଦ୍ୟାଶକ୍ତି ଦୁର୍ଗେ ଦୁର୍ଗତି ନାଶିନୀ
ନଷ୍ଟ କର ଦୁଷ୍ଟ ପାପିଷ୍ଟ ପାମର
ଶ୍ୱେତ ଶିଖରୁ କି ଇଷ୍ଟ ମନାସୁଛି।।
************************