କାର୍ତ୍ତିକ ପୂର୍ଣ୍ଣିମା

ଆମ ସଂସ୍କୃତିରେ କାର୍ତ୍ତିକ ପୂର୍ଣ୍ଣିମା 

ଅଟେ ଏକ ପୂଣ୍ୟ ଦିନ 

ପରମ୍ପରା ଆଳେ ପ୍ରଭାତରୁ ଉଠି 

ସଭିଏଁ କରନ୍ତି ସ୍ନାନ l

ନୌବାଣିଜ୍ୟର ସ୍ମୃତି ବଖାଣନ୍ତି 

ବୋଇତ ବନ୍ଦାଣ କରି 

ଭଜନ କୀର୍ତ୍ତନେ ଦିନ କାଟିଥାନ୍ତି 

ହୃଦୟରେ ଭକ୍ତି ଭରି l

ଆ-କା-ମା-ବୈ ଧ୍ୱନି ଉଚ୍ଚାରଣ କରି 

ସର୍ବେ ଭସାନ୍ତି ବୋଇତ 

ପଞ୍ଚୁକ ତିଥିରେ ବୁଡ଼ ଯେ' ପକାନ୍ତି 

ନ ଡରି ସକାଳ ଶୀତ l

କଦଳୀ ପାଟୁକା ଡ଼ଙ୍ଗାକୁ ଭସାନ୍ତି 

ପାନ ଗୁଆ ଥୋଇ ଦେଇ 

ମାସକ ଯାକର ଧର୍ମ ଅରଜନ୍ତି 

ମନ୍ଦିରେ ଦୀପ ଜଳାଇ l

ସକାଳ ସଞ୍ଜରେ ରଙ୍ଗୋଲି ପକାଇ 

ଜାଳିଥାନ୍ତି ଧୂପ ଦୀପ 

ବୃଦ୍ଧ ବୃଦ୍ଧା ଯେତେ ଏ ପୂଣ୍ୟ କାର୍ତ୍ତିକେ 

କରିଥାନ୍ତି ଜପ ତପ l

ଶଙ୍ଖ ହୁଳହୁଳି ଶବଦେ କମ୍ପଇ 

ଆମ ଏ ପବିତ୍ର ମାଟି 

ମହା କାର୍ତ୍ତିକର ଭକ୍ତିମୟ ପଥେ 

ରିଷ୍ଟ ଯାଏ ଆପେ କଟି l