କାକରା ପିଠାର ବୃତ୍ତାନ୍ତ

ଆହାକି ସୁଆଦ ମୋର ପ୍ରିୟ ଖାଦ୍ୟ

କାକରା ପିଠାଟି ଜାଣ,

ଥରେ ଦେଲେ ଖାଇ ମନ ନିଏ ମୋହି

ତିଆରି ବିଧି ଯେ ଶୁଣ ।

ଧୋଇଧାଇ କରି ଯତନରେ ଭାରି

ଅରୁଆ ଚାଉଳ ଚୁନା,

ଭାଗ ମାପ କରି ଚିନି ଦେଇ ଭରି

ସାଥିରେ ନଡ଼ିଆ ଛେନା ।

ପାଣିକୁ ଫୁଟାଇ ଚୁନାକୁ ଗୋଳାଇ

ସୋଦୁଅ ତିଆରି କଲି,

ଥଣ୍ଡା ହେଲା ପରେ ପୁରକୁ ସେଥିରେ

ଭରି ପିଠା ଗଢି ଦେଲି ।

କଡେଇ ତତେଇ ତେଲ ଢାଳି ଦେଇ

ପିଠାକୁ ଛାଡିଲି ତହିଁ,

ନାଲି ନାଲି ହେଲା ସୁନ୍ଦର ଦିଶିଲା

ଖୁସିରେ ହସିଲି ମୁହିଁ ।

ଛାଣିକି ରଖିଲି ଚାଖିକି ଦେଖିଲି

ପାଟିରୁ ବହିଲା ଲାଳ,

କହିଥିଲେ ମିତ ଆସିବେ ବୋଲି ତ

ଉଛୁର ହୋଇଲା ବେଳ ।

ଫୋନ୍ କରି ଡାକି ରହିଲି ଚାହିଁକି

ଆସିଲେ ସେ ମୃଦୁ ହସି,

ପାଖେ ଗଲେ ବସି ଦେଲି ମୁଁ ପରଶି

ଦୁହେଁ ତ ଖାଇଲୁ ମିଶି ।