ଜୀବନ ତତ୍ତ୍ୱ
ଜୀବନ ତତ୍ତ୍ୱ
ଜନମ କୁହଇ ମରଣ କୁ ଆଲୋ
ମତେ ଦେଖି ସର୍ବେ ଖୁସି,
ତୋତେ ଦେଖି କିଆଁ ସାରା ସଂସାରଟା
ଲୁହରେ ଯାଅଇ ଭାସି।
ସ୍ମିତହାସ୍ୟ ଦେଇ ମରଣ କହିଲା
ଏଇ ତ ଜୀବନ ତତ୍ତ୍ୱ,
ମୁଁ ନ ଥିଲେ କି ଏଇ ସଂସାରରେ
ଥାଆନ୍ତା ତୋର ମହତ୍ତ୍ୱ।
ତୋ ଠାରୁ ଆରମ୍ଭ ଏ ଜୀବ ଜଗତ
ମୋ ଠାରେ ହୁଅଇ ଶେଷ,
ନିଶା ନ ଥିଲେ କି ଉଷାର ମହତ୍ତ
ହେଉଥାନ୍ତା ପରକାଶ।
ଜନ୍ମରୁ ମରଣ ସମୟ ଅବଧି
ବୋଲାଏ ପରା ଜୀବନ,
କୁକର୍ମୁ ଦୂରେଇ ସୁକର୍ମ କୁ କରି
ଅରଯିବା ଯଶ ମାନ।
କୋଟି ପୂଣ୍ୟ ବଳେ ମଣିଷ ଜୀବନ
ଲଭିଅଛୁ ଏ ଜନମେ,
ସବୁରି ମନରେ ଜାଗାଟିଏ ଆମେ
ହାତେଇବା ସ୍ୱକରମେ।
ଦୁନିଆ ମଞ୍ଚରେ ଜୀବନ ଯାତ୍ରାରେ
ନିର୍ଦ୍ଦେଶକ ସେ ଇଶ୍ୱର,
ଇଙ୍ଗିତରେ ତାଙ୍କ ଅଭିନୟ ଚାଲେ
କଳାକାର ମାନଙ୍କର।
ଅଭିନୟ ସାରି ବାହୁଡିବା ଦିନେ
ଏ କଥା ସ୍ଥିର ନିଶ୍ଚିତ।
ଅମୂଲ୍ୟ ଜୀବନ ଆନନ୍ଦେ କାଟିବା
ଯେ ଯାଏଁ ଅଛେ ଜୀବିତ।
ପ୍ରୀତିପ୍ରିୟା ମହାନ୍ତି
ମୟୂରଝାଲିଆ,ରଣପୁର
ନୟାଗଡ଼