ଜୀବନ ସଉଦା
ଜୀବନ ସଉଦା
ଜୀବନ ସଉଦା କରିବି ସାଆନ୍ତେ
ଶ୍ରୀକ୍ଷେତ୍ରେ ଆସିଛି ଧାଇଁ
ନୟନ ଲୋତକ ଅବିରତ ବହେ
ବଡ଼ଦାଣ୍ଡ ଯାଏ ଧୋଇ ।
ଜୀବନ ବିକିବି ଆସି ଅଛି ପାଶେ
ସହି କେତେ ଅସୁବିଧା
ପ୍ରଶାସନଙ୍କର କେତେ କଟକଣା
ମିଳୁଛି ଗୋଇଠା ବିଧା ।
ମୁଖେ ତୁଣ୍ଡି ଦେଇ ବିକି ପାରୁ ନାହିଁ
ସଉଦା ରହୁଛି ଅଧା
କ୍ଷତି ହେବ ନାହିଁ କିଣି ନିଅ ପ୍ରଭୁ
ଏତ ଜୀବନ ସଉଦା ।
କରୋନା ଭୁତାଣୁ ଲେଉଟି ଆସିଛି
ଶବ ପଡେ ଗଦା ଗଦା
ଟିଭି ପରଦାରେ ସମାଚାର ପତ୍ରେ
ଖବର ଆସୁଛି ସଦା ।
ଭୋକ ଉପାସରେ ପରିବାର ମୋର
କାଟୁଛନ୍ତି ତାଙ୍କ କାଳ
ଜଣା ନାହିଁ ମୋତେ କେବେ ନେଇ ଯିବ
ବାନ୍ଧି ତାଙ୍କୁ ମହାକାଳ ।
ମାନବ ଜଗତ ଆଜି ଭୁପତିତ
ଏ ସବୁ କରୋନା କାଳେ
ଏବେ କାହିଁ ପାଇଁ ନିଦ୍ରିତ ରହିଛ
ରଖି ସବୁ ଆଢ଼ୁଆଳେ।
ହେ ହାଟ ବେପାରୀ ଦିଅ ହେ ଉଧାରୀ
ରଖି ନେଇ ମୋତେ ବନ୍ଧା
ଜୀବନ ଟା ମୋର ବିକ୍ରି କରି ଦେବି
କର ହେ ପ୍ରଭୁ ସଉଦା ।