ଜୀବନ ଦୀପ

ତିମିର ନାଶିନୀ ଜ୍ଞାନ ପ୍ରଦାୟିନୀ

      ମାତ ଅମାବାସ୍ୟାର ଦୀପ

ଦାରିଦ୍ର୍ୟ ଗଞ୍ଜିନୀ ପତିତପାବନୀ

        ମାଆ ଗୋ ବାଞ୍ଛାନିଧି ବଟକଳ୍ପ !

ସତୀ ଶିରୋମଣୀ ଶଙ୍କର ଧର୍ମିଣୀ

         ମାତ ଦୁର୍ଗତିନାଶିନୀ ଦୁର୍ଗା

କାଳରାତ୍ରୀ କାଳୀ ନିର୍ବଳର ବଳୀ

        ମାଆ ଗୋ ଦଳନ କାରିଣୀ ଦୁର୍ବା !

ଅଭୟ ଦାୟିନୀ ଆର୍ତ୍ତ ସନ୍ତୋଷିନୀ

        ମାତ ତ୍ରିଦେବ କରନ୍ତି ତୋ ପୂଜା

ସ୍ୱର୍ଗ ଦେବକୁଳ ମାନବ ସକଳ

        ଉଡ଼ାନ୍ତି ତୋହରି ଧରମ ଧ୍ୱଜା !

ନାରୀ ନାରାୟଣୀ ଗିରିଜା ନନ୍ଦିନୀ

         ମାଆ ଗୋ ଶକ୍ତିସ୍ୱରୂପିଣୀ ଦ୍ଧାତ୍ରୀ

ଅନ୍ନ ପ୍ରଦାୟିନୀ  କ୍ଷୁଧା ନିବାରିଣୀ

        ମାତ ପୃଥ୍ୱୀରାଣୀ ତୁ ଧରିତ୍ରୀ !

ସଙ୍କଟ ତାରିଣୀ  କାର୍ତ୍ତିକ ଜନନୀ

         ମାଆ ଗୋ ଶାନ୍ତିସ୍ୱରୂପିଣୀ ଶକ୍ତି

ପ୍ରାଣ ପ୍ରଦାୟିନୀ  ଦାନଵ ଦଳିନୀ

        ମାତ ମୁକ୍ତି ପ୍ରଦାୟିନୀ ଭକ୍ତି !

ସନ୍ତାନ ପାଳିନୀ ପ୍ରେମ ପ୍ରଭାସିନୀ

       ମାଆ ଗୋ ପୂଣ୍ୟକର୍ମର ଦେଉ ଶିକ୍ଷା

ବ୍ରହ୍ମାଣୀ ରୁଦ୍ରାଣୀ ପାପିଷ୍ଠ ପାବନୀ

        ମାତ ଗୁରୁ ରୂପେ ଦେଉ ଦୀକ୍ଷା !

ଜୀବନ ମରଣ  ସକଳ କାରଣ

        ମାଆ ଗୋ ସୃଷ୍ଟି ବିଲୟ ତୋ ହସ୍ତେ

ତୋ କୃପା ବଳେଣ ଲଭନ୍ତି ନିର୍ବାଣ

        ମାତ ସୂର୍ଯ୍ୟଦୋୟ କରୁ ଅସ୍ତେ !

ମୁଁ ଛାର ଅଧମ  କି ବର୍ଣ୍ଣିବି ନାମ

        ମାଆ ଗୋ ଅକଳନା ତୋ ଗୁଣଗ୍ରାମ

ନହେବି ଅଶାନ୍ତି  କରନା ବିଭ୍ରାନ୍ତି

        ଦିଅ ଅଭୟ ଚରଣେ ବିରାମ !

ମୁଁ ପତିତ ନର  କରେ ପାପାଚାର

         ନଜାଣେ ପାପପୂଣ୍ୟର ଅନ୍ତର

ପ୍ରାର୍ଥନା ମୋ ଘେନ ପଥ ଦେଖାଇଣ

        କର ସାର୍ଥକ ଏ ଜନମ ମୋର !

ମୋ ଜୀବନ ଦୀପ ହେଉ ନିର୍ବାପିତ 

         ଜଳୁ ଦୀନଜନ ସେବା ପାଇଁ

ରାଷ୍ଟ୍ର ସେବା ହେଉ ଧମନୀର ଲହୁ

        ମାତ ସାଜ ମୋ ଜୀବନ ସାଇଁ !

ଅଜ୍ଞାନରୁ ମୁକ୍ତ  ଅନ୍ଧାରୁ ଉନ୍ମୁକ୍ତ

         ବିଞ୍ଚି ଜ୍ଞାନରଶ୍ମି ମୋ ହୃଦେ

ଶଠତା ବିନାଶି  ଦିବ୍ୟତା ପ୍ରକାଶି

        ମାତ ପ୍ରଦୀପ୍ତକର ତୋ ପାଦେ !