ଜୀବନ ବାଟ

ଶୈଶବେ ପାଇଲି ଆଦର ଯତନ

କୈଶୋରେ ପଢ଼ିଲି ପାଠ

ଯୌବନ ଆସିଲା ପରେ ପରେ ହେଲି

ଯନ୍ତ୍ରଣାରେ ଛଟପଟ ।

ସଂସାର ଜୁଆଳି କାନ୍ଧରେ ପଡିଲା

ଦଉଡିଲି ଅହରହ

ଘର ପରିବାର ଖୁସି ଦେଖିବାକୁ

ଲୁଚାଇଲି ଆଖି ଲୁହ ।

ସାରା ଦିନ ହଜି କର୍ମ ଜଞ୍ଜାଳରେ

ସଂଜକୁ ବାହୁଡେ଼ ଘର

ସବୁ ସଦସ୍ୟଙ୍କ କେତେକେତେ ଆଶା

ଏ କାନରେ ପଡେ ମୋର ।

ଅଧା ରାତି ଯାଏ ଦୀର୍ଘ ନିଶ୍ବାସରେ

ଛାତି ପରେ ଛାତି ଥୋଇ

କ୍ଳାନ୍ତ ହୋଇ ଦେହ ଆଖି ବୁଜୁ ବୁଜୁ

ଏ ରାତିଟା ଯାଏ ପାହି ।

ସକାଳ ଆସିଲେ ପୁଣି ଚାଲିଥାଏ

ପେଟ ଚାଖଣ୍ଡର ନାଟ

ଜରାବସ୍ଥା ପରେ ପାଦ ଅଟକିବ

ସରିବ ଜୀବନ ବାଟ ।

ସିଦ୍ଧେଶ୍ବର ତ୍ରିପାଠୀ

କୁଣ୍ଡିଲୋ କେରଙ୍ଗ ଖୋର୍ଦ୍ଧା