ଜୀବନ (୪)

ଅତସୀ କୁସୁମରେ ଘର ମହକୁଛି ବୋଲି

ନିଶୀଥ ବାତାୟନେ ସନ୍ଧ୍ୟାତାରା ଦିଶୁଛି ବୋଲି

ନିଆଁଝୁଲଟାରେ ଘର ଜଳିଯାଉଛି ବୋଲି

ଜୀବନଟା ଅଛି : 

ପ୍ରଶାସନରେ ବଞ୍ଚକତା ଭରି ରହିଛି ବୋଲି

କର୍ମସଂସ୍କୃତି ଅବକ୍ଷୟମୁଖୀ ହେଉଛି ବୋଲି

ଆଭିମୁଖ୍ୟ ଓ ଦୃଷ୍ଟିରଙ୍ଗୀ ନକାରାତ୍ମକ ହୋଇଛି ବୋଲି

ଜୀବନଟା ଅଛି : 

ଲୁଲୁ ପାଇଁ ନାନା ବାୟାଗୀତ ଲେଖା ହେଉଛି ବୋଲି

ଅନ୍ଧାରୁଆ ଜଣକ ଘରମୁହାଁ ହେଲାଣି ବୋଲି

ସମ୍ଭାବନାର ନୂତନ ସୂର୍ଯ୍ୟୋଦୟ ଦେଖାଯାଉ ବୋଲି

ଜୀବନଟା ଅଛି: 

ସଦ୍ୟ ଶରତର ଶିଶିର ବିନ୍ଦୁରେ ପାର୍ବଣ ଆସିଛି ବୋଲି

ନବୀନ ଉତ୍ସାହ ଓ ଉଦ୍ଦୀପନାରେ ଧରା ମହକି ଯାଉଛି ବୋଲି

ମାଆଙ୍କ ଆଗମନରେ ଧରିତ୍ରୀ ପୃଷ୍ଠ ଉଲ୍ଲସିତ ହେଉଛି ବୋଲି

ଜୀବନଟା ଅଛି: 

ନିର୍ବାଚନୀ ଉଷ୍ଣତାରେ ବାତାବରଣ

ଭରି ଯାଉଛି ବୋଲି

ଆରୋପ ପ୍ରତ୍ୟାରୋପର ପଶାପାଲିରେ ରାଜନୀତି

ଖୋଲାହେଉଛି ବୋଲି

ମଣିଷ ପରିଚୟର ପ୍ରାସଙ୍ଗିକତା ଭୁଲି ଯାଉଛି ବୋଲି

ଜୀବନଟା ଅଛି: 

ଭୋକର ସହରରେ ଭୋଟ୍ ଲଡୁ ବଣ୍ଟାଯାଉଛି ବୋଲି

ରାସ୍ତାର ଗାଡିରୁ କୋଟି କୋଟି ଟଙ୍କା ଉଦ୍ଧାର ହେଉଛି ବୋଲି

ରୌଦ୍ରତପ୍ତ ଧରାପୃଷ୍ଠରେ ଖଟିଖିଆ ସର୍ବହରା ଉପାସରେ ରହୁଛି ବୋଲି

ଜୀବନଟା ଅଛି : 

ଅବମୂଲ୍ୟାୟିତ ନୈତିକ

ମୂଲ୍ୟବୋଧରେ ସମାଜ ନିରବଦ୍ରଷ୍ଟା ସାଜିଛି ବୋଲି

କ୍ରମବର୍ଦ୍ଧିଷ୍ଣୁ ମୂଲ୍ୟବୃଦ୍ଧିରେ ଜନଜୀବନ ବିପର୍ଯ୍ୟସ୍ତ ହେଉଛି ବୋଲି

ଅନ୍ତିମ ମୃତ୍ୟୁର ଆକାରେ ବୃଦ୍ଧ ଜରଦଗବ ତ୍ରସ୍ତ ହେଉଛି ବୋଲି

ଜୀବନଟା ଅଛି: