ଝରିପଡୁଥିବାଲୁହ

କେଉଁ ଏକ ଦୁର୍ବଳ ମୂହୂର୍ତ୍ତରେ 

ତୁମେ ବାନ୍ଧି ଦେଇଥିଲ

ସ୍ଵପ୍ନର ଅନ୍ଧପୁଟୁଳି ମୋ ଆଖି ପତାରେ

ସେଦିନୁ ଖୋଜୁଛି ମୁଁ ତୁମକୁ

ତୁମେ କିନ୍ତୁ ଧରା ଦେଉ ନଥିଲ

ମୋ ହାତ ପାହାନ୍ତାରେ

ଏଠି ହାତ ଲମ୍ଵାଇଲେ ତ୍ ଛୁଇଁ ହୁଏନି ଆକାଶକୁ

ଉପରକୁ ଉଠିବାକୁ ପାଦ ଥାପିଲେ

ଧସିଯାଏ ମାଟି ଅତଡା ତଳକୁ ।

ତଥାପି ଆଶା ଥିଲା ମୋର ଭାରି ତୁମପରେ

କାଳେ ବଦଳାଇ ଦେବ ତୁମେ ତୁମ ଗତିପଥ

କାହିଁକିନା ତୁମେ ନଈ

ଦିନେ ନା ଦିନେ ଯାଇ ମିଶିବ

ନିଶ୍ଚୟ କେଉଁ ସାଗରେ ।

ତୁମ ମରୁଭୂମିରେ ମୁଁ ଏକ ତୃଷାର୍ତ୍ତ ପଥିକ

ତତଲା ବାଲିରେ ଚାଲି ଚାଲି

ପାଦ ଦୁଇଟି କ୍ଲାନ୍ତ ମୋର

କିନ୍ତୁ ତୁମେ ଯେ ସପ୍ତଫେଣୀ

କେମିତି ବା ଦେଇ ପାରିଥାନ୍ତ ମୋତେ

ତୁମେ ତୁମ ଛାଇର ଠିକଣା

କହିଲ ବା ଟିକେ ଦେଖି ?