ଝରି ଝରି ଆସ ବରଷା ରାଣୀ

ବରଷା ରାଣୀ ଗୋ ବରଷା ରାଣୀ

    ତୁମେ ମୌସୁମୀର ସାନ ଭଉଣୀ,

ତା' ହାତ ଧରି ଆସ ଝରି ଝରି

    ଧରିତ୍ରୀ ପୃଷ୍ଠରୁ ଉତ୍ତାପ ହାରିଣୀ,

ଝରି ଝରି ଆସ ବରଷା ରାଣୀ ।

ବଜ୍ରନାଦେ କମ୍ପେ ଆକାଶ ଭୂଇଁ

    ବିଜୁଳି ଚମକେ ଛାତି ଥରାଇ,

ଘନ ଘନ ବର୍ଷା ଶ୍ରାବଣର ଧାରା 

    ଜଳମୟ ମହୀ ତୃପତ ପ୍ରାଣୀ,

ଝରି ଝରି ଆସ ବରଷା ରାଣୀ ।

ଜଳେ ପୂର୍ଣ୍ଣଗର୍ଭା ସରସୀ ନଈ

    ସବୁଜିମା ଖେଳେ ପାହାଡ଼ ଭୂଇଁ,

ତରୁଲତା ନବ ଯୌବନ ଲଭନ୍ତି

    କୃତ୍ୟ କୃତ୍ୟ ଭାବ ଜଣାନ୍ତି ପୁଣି,

ଝରି ଝରି ଆସ ବରଷା ରାଣୀ ।

ତୁମରି ଛୁଆଁରେ ବନ ଝରଣା

    ଝରି ଝରି ବିତରଇ କରୁଣା,

ମାଆ ପରି କୋଳେ ଦେଉଛି ଆଶରା

       ଜଳଚର ପ୍ରାଣୀ ମନକୁ ଜାଣି,

ଝରି ଝରି ଆସ ବରଷା ରାଣୀ ।

ବରଷା ଆକାଶ ଘନ ଅନ୍ଧାରେ

   ଖଦ୍ୟୋତ ମଣ୍ଡଳୀ କି ଆନନ୍ଦରେ,

ପ୍ରକୃତି ନିର୍ଦ୍ଦେଶେ ଜ୍ୟୋତି ପ୍ରକାଶନ୍ତି

     ରିମିଝିମ୍ ତାନେ ଝିଙ୍କାରୀ ନାଚନ୍ତି,

ତୂରୀ ବଜାଏ ତ ବେଙ୍ଗୁଲି ରାଣୀ,

ଝରି ଝରି ଆସ ବରଷା ରାଣୀ ।

କୃଷକ ମନରେ ହରଷ ଭରି

    ମୁଣ୍ଡର ଝାଳକୁ ତୁଣ୍ଡରେ ମାରି,

ସୁନାର ଫସଲ ଅମଳ ଆଶାରେ

    କ୍ଷେତରେ ବିହନ ଦେଉଛି ବୁଣି, 

ଝରି ଝରି ଆସ ବରଷା ରାଣୀ ।

ତୁମ ଆଗମନେ ପ୍ରକୃତି ରସେ

   ଫୁଲ ଫଳେ ବାଡି ବଗିଚା ହସେ,

ତୁମ ପାଇଁ ପରା ଶ୍ୟାମଳିମା ଧରା 

   ଶସ୍ୟ ଫଳାଇ ଦିଅ ଦାନାପାଣି

ଝରି ଝରି ଆସ ବରଷା ରାଣୀ ।