ଝଗଡ଼ା

ଡ୍ରାଇଭରଟି ଶୋଇଲା ଦିନେ ନିଜର ଗାଡ଼ି ଭିତରେ,

ଅଧା ରାତିରେ ସ୍ଵପ୍ନ ଦେଖିଲା ପଡ଼ିଯାଇଛି ଗାତରେ |

ନିଦ ଭାଙ୍ଗିନି ଶୁଣି ପାରିଲା ଚକ କହୁଛି ରାଗରେ,

ମୋ ପାଇଁ ସିନା ଗାଡ଼ି ଚାଲିଛି ତମକୁ କିଏ ପଚାରେ ?

ଷ୍ଟିୟରିଂ କହେ-ଛାଡ଼ ସେକଥା ମୁଁ ବୁଲାଏ ଚକକୁ,

ଟିକିଏ ବଙ୍କା କରିଦେବି ଯେ ଯିବୁ ଆର ପାଖକୁ |

ତେଲ ଟାଙ୍କିଟା ହସି କହିଲା-ମୋ କଥା ପଦେ ଶୁଣିବ ?

ତେଲ ନ ଥିଲେ ଗାଡ଼ି ଚକକୁ ଆଗକୁ କିଏ ଟାଣିବ ?

ବ୍ୟାଟେରୀ କହେ-ମୋ ପାଇଁ ସିନା ଗାଡ଼ି ଷ୍ଟାର୍ଟ ହେଉଛି,

ଇଂଜିନ ଚାଲେ ତେଲ ବି ଜଳେ ଗାଡ଼ି ଆଗକୁ ଯାଉଛି |

ଚାବି କହିଲା-ମୁଁ ସିନା ଛୋଟ କାମ ଥାଏ ମୋ ପାଖରେ,

ସବୁ ଥାଇ ବି ଗାଡ଼ି ଅଚଳ କରିପାରେ ମୁଁ ବାଟରେ |

ସେତିକି ବେଳେ ଚକର ପିନ ଫୁସକରି ଖୋଲିଲା,

ପବନ ନାହିଁ ଗାଡ଼ି ଅଚଳ ତାଙ୍କ ଝଗଡ଼ା ତୁଟିଲା |