ଜାଲାଆନାୱାଲାବାଗ ଶତବାର୍ଷିକୀ

ଭାରତର ସ୍ଵାଧୀନତା ସଂଗ୍ରାମରେ ସବୁଠୁ ବଡ ଘଟଣା

ବର୍ବରତାର ସବୁ ସୀମା ଟପି ଲକ୍ଷ୍ମଣ ରେଖାଟି ଟଣା ।

ଉନେଇଶ ଉନେଇଶ ଅପ୍ରେଲ ତେର ପଂଜାବ ପ୍ରଦେଶ କଥା

ଶିଖ୍ ବୀରର ବଳିଦାନ ଯହିଁ ଗାଏ ଅସରନ୍ତି ଗାଥା ।

ଅମୃତସରର ଜାଲାଆନାୱାଲାବାଗ ପଡିଆରେ ବସି

ସଭା କରୁଥିଲେ ଇଂରେଜୀ ଶାସକ ବିରୋଧୀ ପଂଜାବ ବାସୀ ।

ଜେନେରାଲ୍ ଡାୟାର୍ ହେଲା ରକ୍ତମୁଖା ଚାରିପଟ କଲା ବନ୍ଦି

ବାହାରି ଯିବାକୁ ସୁଯୋଗ ନଦେଇ କରିଲା ନୂତନ ଫନ୍ଦି ।

ଆଖିବୁଜା ଗୁଳି ଚାଳନା କରିଲେ ଫିରଂଗୀ ସେ ପଡିଆରେ

ଆବାଳବୃଦ୍ଧବନିତା ସଭିଏଁ ଏକତ୍ରିତ ଯେଉଁଠାରେ ।

ଧାଁ ଦଉଡରେ ଦଳା ଚକଟାରେ ଥୋକେ ଗଲେ ଯମପୁର

କୂଅ ଭିତରକୁ ତେଇଁଲେ ଥୋକାଏ ବିକଳ ଆକୁଳ ସ୍ୱର ।

ମା ଶବପାଖେ ଅପତ୍ୟ ବାହୁନେ ଥମିଲାନି ଗୁଳିଗୋଳା

ହଜାର ସଂଖ୍ୟାରେ ଶବ ଛାଇଗଲା ବାଳୁତ ବୃଦ୍ଧ ଅବଳା ।

ସାନ ପିଲାଟିଏ ଉଦ୍ଦାମ ସିଂ ଉଦ୍ଦାମତା ଭରା ଛାତି

ପ୍ରତିଶୋଧ ନେବ ପ୍ରତିଜ୍ଞା କରିଲା ଛାଡି ମରଣର ଭୀତି ।

ବ୍ରିଟିଶ୍ ପାର୍ଲାମେଣ୍ଟରେ ଡାୟାର୍ ସମ୍ବର୍ଦ୍ଧନା କଥା ଶୁଣି

ନବ ଉନ୍ମାଦନା ଭରି ଉଦ୍ଦାମ ପୁରା କରିବ କାହାଣୀ ।

ଗୀତା ପୁସ୍ତକେ କାଟି ଖୋପଟିଏ ରିଭଲଭର ଖଂଜିଲା

ପାର୍ଲାମେଣ୍ଟର ଦର୍ଶକ ଗ୍ୟାଲେରି ଉପରେ ଯାଇ ବସିଲା ।

ସମ୍ବର୍ଦ୍ଧନା ବେଳ ଉଣ୍ଡି ଛିଡହେଲା ଉଦ୍ଦାମ କୋପଭରେ

ଚଳାଇଲା ଗୁଳି ଡାୟାର୍ ଛାତିକୁ ଟଳି ପଡିଲା ସେଠାରେ ।

ପାଲଟା ଗୁଳିରେ ଜୟ ଜାଲାଆନାୱାଲାବାଗ ଧ୍ୱନି ଦେଇ

ଗଗନ ପବନ ପ୍ରକମ୍ପିତ କରି ଚୀର ନିଦନିଦ୍ରା ଗଲା ଶୋଇ ।

ଉତ୍ତରାଖଣ୍ଡରେ 'ଉଦ୍ଦାମ ସିଂ ନଗର' ଜିଲ୍ଲା ନାମିତ

'ଶହୀଦ-ଇ-ଆଜମ' ମହାନ ଉପାଧି ମହାନ ଯୋଦ୍ଧା ନିମିତ୍ତ ।

ଦେଶ ପାଳେ ଜାଲାଆନାୱାଲାବାଗର ଶତବାର୍ଷିକୀ ଆଜ

ଉଦ୍ଦାମ ସିଂ ଆଦର୍ଶ ଆମର ଯୁବପିଢି ହୁଅ ସଜ ।

-ବିଶ୍ୱେଶ୍ଵର ମାଝୀ-