ଇଲୋ ମୋ ବୋଉ

ଆମରି ଗାଆଁର ମାଗୁଣି ସାହୁ,

ସକାଳୁ ଖାଏ ସେ' ମାଣ୍ଡିଆ ଜାଉ ।

ଚହଟ ଚିକ୍କଣ ବଢ଼େଇ ପିଲା ,

କାଠ କାଟିବାକୁ ଜଙ୍ଗଲ ଗଲା ।

କୁରାଢ଼ି ତାହାର କାନ୍ଧରେ ଥିଲା ,

ଭଲକି ପଜେଇ ସାଥିରେ ନେଲା ।

ଚାକୁଣ୍ଡା ଗଛଟେ ଦେଖିଲା ଭାଇ ,

ମନରେ ଭାବିଲା କାଟିବ ସେଇ ।

ମାଙ୍କଡ ପିଲାଟେ ଗଛରେ ଥିଲା

ଲାଞ୍ଜଟି ତାହାର ଲମ୍ବେଇ ଦେଲା ।

ମାଗୁଣି କାଟିଲା ଗଛର ଡାଳ ,

ଘରକୁ ଯିବାକୁ ବେଗେ ସହଳ ।

କାଠ କାଟି ଗୋଛା ବାନ୍ଧିବା ପାଇଁ ,

କୁରାଢ଼ି ଗୋଟିକୁ ଦେଲାତ ଥୋଇ ।

ମାଙ୍କଡ ପିଲାଟି ଓହ୍ଲେଇ ଆସି ,

କୁରାଢ଼ି ସାଉଁଟି ଗଛରେ ବସି ।

ଧଇଲା କୁରାଢି ହାଣିବ କାଠ ,

ଶିଖିତ ଯାଉଛି ବଢ଼େଇ ପାଠ ।

ଧରିଲା କୁରାଢ଼ି ମାରିଲା ଚୋଟ ,

କଟିଲା ଲାଙ୍ଗୁଡ଼ ହୋଇଲା ଛୋଟ ।

ବିକଳ ହୋଇଣ ଛାଡ଼ିଲା ରଡ଼ି ,

କାନ୍ଦି କାନ୍ଦି ଗଲା ତଳେ ସେ' ପଡି ।

ବହିଲା ରକତ ଧାରକୁ ଧାର ,

ଡାକିଲା ହେ' ପ୍ରଭୁ ରକ୍ଷା ତ କର ।

ଲାଞ୍ଜକୁ ଗୋଟେଇ ଗଛକୁ ଗଲା ,

ଖଣ୍ଡି ଲାଙ୍ଗୁଡ଼କୁ ଦେଖି କାନ୍ଦିଲା ।

କାନ୍ଦି କାନ୍ଦି କହେ ଇଲୋ ମୋ ବୋଉ ,

କାଠ କାଟିବା ମୋ' ସେତିକି ଥାଉ ।

ନ ଜାଣି ନଶୁଣି କାମ କରିଲେ ,

ଏହିପରି ଫଳ ମିଳଇ ଭଲେ ।

ଶୁଣରେ ପିଲାଏ ଗୁରୁ ବଚନ ,

ଅଳପ ଶିଖିଣ ନକର କାମ ।

ମାଙ୍କଡ ପରିକା ନହେବ ଦୁଷ୍ଟ ,

ନହେଲେ ପାଇବ ଅନେକ କଷ୍ଟ ।