ହସି ଦିଅ ଟିକେ

ମନ ମାରି କାହିଁ ବସି ଗଲ ପ୍ରିୟ

   ମନକୁ ହାଲୁକା କର,

ଏ ସମୟ ବେଶି ଦିନ ରହିବନି

   ଡର କର ମନୁ ଦୂର ।। ୧

ଉଆଁସ ଅନ୍ଧାର ଗୋଟିଏ ରାତିର 

   ନିଶ୍ଚୟ ଉଇଁବ ଚାନ୍ଦ,

ପୂର୍ଣ୍ଣିମାର ଜହ୍ନ ନିଶ୍ଚୟ ଝଳିବ

   ମନୁ ଦୂର କର ଦ୍ୱନ୍ଦ୍ୱ ।। ୨

ଧୈର୍ଯ୍ୟ ମନୋବଳ ନକରି ଦୁର୍ବଳ

   ମନରେ ବାନ୍ଧ ସାହସ,

ବିପଦରେ ଯଦି ଧୈର୍ଯ୍ୟହରା ହେବ

   ହୋଇଯିବ ସର୍ବନାଶ ।। ୩

ଯେଉଁ ଶତ୍ରୁ ପାଇଁ ଯେଉଁ ପ୍ରତିକାର

   ତାହାକୁ ଜାଣିବା ଠିକେ,

ସେହି ପ୍ରତିକାର ଦୃଢେ ପାଳୁଥିଲେ

   ସଙ୍କଟ ନଥିବ ଟିକେ ।। ୪

ବିପଦ ବେଳର ବଡ଼ ସହଚର

  ଅଟେ ସିନା ମନୋବଳ,

ମନୋବଳ ବଳବତ୍ତର ରହିଲେ

   ନିଶ୍ଚେ ମିଳି ଯିବ କୂଳ ।। ୫

ମନେ ଦୁଃଖ ଥିଲେ ହୃଦୟଟା ସିନା

    ହୋଇଯାଏ ଭାରାକ୍ରାନ୍ତ,

ହୃଦୟର ଭାରେ ଶରୀର ଓ ମନ

   ଉଭୟେ ହ୍ୱନ୍ତି ଆକ୍ରାନ୍ତ ।। ୬

ମନ ଓ ହୃଦୟ ସୁସ୍ଥ ଥିବ ଯେବେ

   ଶରୀର ରହିବ ସୁସ୍ଥ,

ନହେଲେ ବିପଦ ଘନେଇ ଆସିବ

   ହେବା ଖାଲି ଅପଦସ୍ତ ।। ୭

ହସି ଦିଅ ଟିକେ ଫୁର୍ତ୍ତି ରହୁ ମନ

   ପାଖ ମାଡିବନି ଦୁଃଖ,

ଦେହ ମନ ହୃଦ ସୁସ୍ଥ ରହି ଥିଲେ

   ଲହଡ଼ା ମାରିବ ସୁଖ ।। ୮