Library
ହୃଦୟର ଗୁପ୍ତ ଗୀତ
ହୃଦୟର ଗୁପ୍ତ ଗୀତ
ହୃଦୟକୁ ସ୍ପର୍ଶ କଲା ପ୍ରୀତିର ବସନ୍ତ
ମନ ଦେଇ ବହିଗଲା ପ୍ରେମର ମଳୟ,
ତୁମେ ଯେବେ ହସିଦେଲ କିମିଆଁ ଚାହିଁକି
ଘେରିଗଲା ମୋତେ ଏକ ପ୍ରେମର ବଳୟ ।
ବର୍ଷା ହେଲା ବିନ୍ଦୁ ବିନ୍ଦୁ ପ୍ରେମର ଫଲଗୁ
ଓଠ କଥା ଲାଗୁଥିଲା ଫଗୁଣର କୁହୁ ।
ବ୍ୟଗ୍ର ଥିଲା କହିବାକୁ ତୁମ ଦୁଇ ଆଖି
ଚଞ୍ଚଳତା ଥିଲା, ପଡୁନଥିଲା ସେ ଥକି ।
ଟାଣି ନେଲ ହୃଦୟକୁ କିଣି ମୋର ମନ,
ତୁମେ ମୋତେ ଶିଖାଇଲ କ’ଣଯେ ପ୍ରେମ ।
ଭାବିଛି ଅନେକ ତୁମ ମନକୁ କିଣିବି,
ଛପି ଛପି ମୁଁ ତୁମର ହୃଦୟ ଜିଣିବି ।
କାହିଁକି ମୋ ମନ କଥା ମନେ ମରିଯାଏ,
ଅସ୍ତମିତ ସୂର୍ଯ୍ୟ ପୁଣି ଉଷା ତାରା ପ୍ରାୟେ ।
ବଡଘର ଝିଅ ତୁମେ ଅତି ଅଲିଅଳି,
ସୁବର୍ଣ୍ଣ କଣ୍ଢେଇ ଛାଡି ଖେଳିବକି ଧୁଳି?
ଧୂଳି ହୋଇ ସାଜନ୍ତି ମୁଁ କିପରି ଖେଳନା?
କାଳେ ତୁମେ ଖେଳିବାକୁ କରିଦେବ ମନା ।
ଉଜ୍ୱଳ ଆକାଶେ ତୁମେ ପୂର୍ଣ୍ଣିମାର ଜହ୍ନ,
ଧରିତ୍ରୀ ପୃଷ୍ଠରେ ମୁଁଯେ କାହିଁ ବା ବାମନ !
ତୁମ ଚତୁଃପାର୍ଶେ୍ୱ ଥିଲା ଆଭିଜାତ୍ୟ ବନ୍ୟା,
ବନ୍ୟା ପାରିବାକୁ ମୋର ଯୁ ନାହିଁ ଜମା ।
ତୁମେ ଦୁଧ ପିଉଥିଲ ଆଖି ବୁଜି ବୁଜି ,
ନ ଜାଣୀବା ଛଳନକୁ ଅଭିନୟ ରଚି ।
ଜହ୍ନ କୁ ମୁଁ କହିଥିଲି ଜାଳିଛି ଜାଗର,
ଆଖିରୁ ଝରାଇ ବର୍ଷା ରହି ଉଜାଗର ।
ପ୍ରେମର ଗୋଲାପ ହେଲା ମଉଳା ଆସନ୍ନ,
ତୁମ ପରଶରେ ଏବେ ନୂତନ ଜୀବନ ।
ନିର୍ଭୟର ଲମ୍ବା ହାତ ଦେଇଛ ବଢାଇ,
ତଥାପି ବିବେକ ସାଥେ ଚାଲିଛି ଲଢାଇ ।
କହିଦେଲେ କାଳେ ମୋର ହୋଇବ ଭଟକା,
ଚରିତ୍ରରେ ଫୁଟିଯିବ କଳଙ୍କ ଫୋଟକା ।
ପ୍ରେମ ଏକ ସେତୁବନ୍ଧ ଦୃଢ ବିଶ୍ୱାସର,
ଥିଲେ ତୁମ ସମର୍ଥନ ନାହିଁ ମୋର ଡର ।
ମନ ବଦଳିଲେ ପର କ୍ଷଣେ ଚାପେ ପଡି,
ଅନୁତାପେ ଛିଡିଯିବ ଧୌର୍ଯ୍ୟର ଦଉଡି ।
ତୁମେ ବଡଘର ଝିଅ ଦୋଷ ନ ଲାଗିବ,
କଳଙ୍କର ବନ୍ୟାଟିଏ ମୋ ଦେହେ ବହିବ ।
କହିଦେଲେ କରିବନି ମହା ପ୍ରଳୟଟେ,
ଚିଠି କହେ ତୁମେ ବିତ ଭଲ ପାଅ ମୋତେ ।
ଛଳନାର ପ୍ରଶ୍ନଟିଏ କି କହିବି ବୋଲି,
କହିବି ତୁମକୁ ମୁଁଯେ ଭଲପାଏ ଖାଲି ।
ଯାହା ଚାହୁଁଥିଲା ମନ ସବୁ ଦେଲିକହି,
କି କହିବ ବୋଲି ତୁମେ ରଖିଛ ଲୁଚାଇ ।
ଯାଣେ ମୁଁ କହିବ ତୁମେ ମୋତେ ଭଲପାଅ,
ନ ଲୁଚାଇ ସବୁକଥା ଖୋଲି କହିଦିଅ ।
ଏ ବ୍ୟତୀତ ତୁମେ ଯଦି ଭାବ ଅନ୍ୟ କିଛି,
ଭୁଲ୍ ବୁଝିବନି ମୋତେ ନଭାବିବ କିଛି ।
ମନା କରିଦେଲେ ପାଦ ଦେବିନାହିଁ ତୁମ ପ୍ରେମ ଦୁନିଆଁରେ,
ତଥାପି ମୁଁ ଭଲ ପାଇବି ତୁମକୁ ଏକାନ୍ତେ ମୋ ହୃଦୟରେ ।
E-mail: subhakantasahu@gmail.com
ମୋ-୯୮୬୧୭୩୨୨୫୬
ଶୁଭକାନ୍ତ ସାହୁ, ଗୋପବନ୍ଧୁ ହାଇସ୍କୁଲ୍, ପୋଲସରା,ଗଂଜାମ,ପିନ୍-୭୬୧୧୦୫ ।
