ହୋଲି

ଅସରନ୍ତି ଖୁସି ଅମାପ ଶରଧା

ହୃଦୟରେ ଭରି ଦେଇ

ବରଷକେ ଥରେ ଆସିଛିରେ ହୋଲି

ରଙ୍ଗର ପସରା ନେଇ l

ପିଲା ଠାରୁ ବୁଢ଼ା ସଭିଏଁ ଖେଳନ୍ତି

ହୋଲିରେ ଏକାଠି ହୋଇ

ଜାତି ଧର୍ମ ବର୍ଣ୍ଣ ମାନ ଅଭିମାନ

ମନୁ ପୁରା ଭୁଲି ଯାଇ l

ପିଚକାରି ମାରି ଫଗୁରଙ୍ଗ ଧରି

ଆନନ୍ଦେ ଖେଳନ୍ତି ହୋଲି

ଫଗୁଣ ଲଗନେ ଉଲ୍ଲସିତ ମନେ

ଗପନ୍ତି ହୃଦୟ ଖୋଲି l

ଅବିର ଉଡ଼ଇ ଆକାଶରେ ପରା

ପୀରତି ପସରା ମେଲି

ବିମାନରେ ବସି ଶ୍ରୀରାଧାଗୋବିନ୍ଦ

ଆସୁଥାନ୍ତି ଦାଣ୍ଡେ ବୁଲି l

ନାନାରଙ୍ଗେ ଭରା ମାଠିଆକୁ ଟାଙ୍ଗି

କରନ୍ତି ହୋଲିରେ ମଜା

ରାଧାକୃଷ୍ଣ ପ୍ରେମେ ମଜିଯାଇ ସର୍ବେ

ବଜାନ୍ତି ମୃଦଙ୍ଗ ବାଜା l

ସେନେହ ମମତା ଭାଇଚାରା ଭାବେ

ଲଗାଇ ପୀରତି ଛୁଆଁ

ରଙ୍ଗର ମେଲଣ ସବୁଠାରେ ବସେ

ସହର ହେଉ ବା ଗାଆଁ l

ସତରେ ଅନନ୍ୟ ନିଆରା ଏ ପର୍ବ

ମନେ ଭରେ ସ୍ନେହ ପ୍ରୀତି

ଗୌରବର ଗାଥା ସଂସ୍କୃତିର ବାର୍ତ୍ତା

ବଖାଣୁ ଥାଏ ସେ ନିତି l