ହେ ବସନ୍ତ ! ଆଖିରେ ଲୁହ କାହିଁକି !

ହେ ବସନ୍ତ ! ଆଖିରେ ଲୁହ କାହିଁକି !

-ଶାନ୍ତିଲତା ମିଶ୍ର

ଏତେ ସନ୍ତର୍ପଣେ

ଏ ବିକ୍ଷିପ୍ତ ବସବାସେ

କାହିଁକି ଆସୁଛ

ପାଦ ଚିପି ଚିପି ବସନ୍ତ ଆଜି l

କେହି ଦୁର୍ବୃର୍ତ୍ତର

ସମ୍ମୁଖୀନ ହୋଇଯିବ କାଳେ

ସେପରି ଭୟାଳୁ ଦୃଷ୍ଟିରେ

ଚାରିଆଡ ଖେଳାଉଛ ଆଖି l

ସଦା ସୁସଜ୍ଜିତା, ଅନିନ୍ଦ୍ୟା ଗୋ !

ଆଜି ମଳିନ ମୁଖ ମଣ୍ଡଳ

ଯେଉଁଠି ନିତି ପ୍ରତି ଲାବଣ୍ୟ ଝରଇ,

ସେଠି ଏ ଉଦାସୀନତା l

ସତେକି ସେ କରୋନା

ଛଦ୍ମବେଶୀ ରାବଣ ବେଶେ ଆସି

ନେଇଯିବ ତୁମକୁ କି ତା

କୋଭିଡ ରଥରେ ବସାଇ l

ଯଦିବା ଧରିନେବ କପଟେ

ସେ ରାକ୍ଷସ ଦୁରାଚାରୀ

ଆସିବେ ତ ନିଶ୍ଚେ

ବୈକୁଣ୍ଠ ବିହାରୀ ରାମ ବେଶଧରୀ l

ତାଙ୍କ ଶକ୍ତି କଣ ଅଜଣା ତୁମକୁ

ନା ଏ ବିଶ୍ଵରେ ଆଉ କାହାକୁ

ଯେତେ ହେଉପଛେ ଡେରି,

ଆସିବେ ଉଦ୍ଧରିବାକୁ ପାପୀ କବଳୁ l

ଶୋଚନା ନକରି ସୁସଜ୍ଜିତ ହୋଇ

ନିଜ ସୌନ୍ଦର୍ଯ୍ୟ ସମ୍ଭାରେ ହସାଅ ଏଇ ଧରାକୁ

ପୂର୍ବପରି କର ସମ୍ମୋହିତ

କର ବିମ୍ମୋହିତ ଅଙ୍ଗେ ଭରି ଲକ୍ଷେ ସୁଷମାକୁ l