ହେ ବ୍ରହ୍ମାଣ୍ଡ ନାୟକ

• କବି ପ୍ରଫୁଲ୍ଲ ଚନ୍ଦ୍ର ମିଶ୍ର , ମଙ୍ଗଳାଯୋଡି , ଖୋର୍ଦ୍ଧା

• ---------- -------------------- ----------

• ଆହେ ବ୍ରହ୍ମାଣ୍ଡ ନାୟକ ବୈକୁଣ୍ଠ ବିହାରି

ଚତୁର୍ଭୁଜ ଗଦାମ୍ବୁଜ ଶଂଖ ଚକ୍ର ଧାରି

• ସୁପର୍ଣ୍ଣ ଆସନ, ଚାରୁ ଶ୍ୟାମଳ ବିମଳ

କାନ୍ତି ବିଭାସେ, ମଞ୍ଜୁଳ ଶିଖିପୁଛ୍ଛ ଚୁଳ

• ବନ୍ଦଇ ମନ୍ଦରଧର,ଶୈ।ରି,ବଂଶୀଧାରି

ଆହେ ବ୍ରହ୍ମାଣ୍ଡ ନାୟକ ବୈକୁଣ୍ଠ ବିହାରି ।।

•

• ନିଃସହାୟ ନିଃସଙ୍ଗ ଏ ଅନିତ୍ୟ ସଂସାରେ

ବିକଳେ ଜଳେ ଜୀବନ ପଡି ଦୁଃଖାନଳେ

• ପର କରି ନରହରି ଦୂରେ ଦିଅ ଠେଲି

ଦୁଃଖୀ ଦରିଦ୍ର ବୋଲି କି କରୁଛ ଏଭଳି

• ତଥାପି ଡାକଇ ରଙ୍ଗାପଦେ ଲୟକରି

ଆହେ ବ୍ରହ୍ମାଣ୍ଡ ନାୟକ ବୈକୁଣ୍ଠ ବିହାରି ।।

•

• ପାର୍ଥିବ ସଂସାରେ ବିଷ ବିଷୟାରେ ଭୋଳା

ସହସ୍ର ଫଣୀ ଦଂଶନ ସମ ସହେ ଜ୍ବାଳା

• ରାହୁଗ୍ରାସେ ଯଥା ଚନ୍ଦ୍ର ଦିଶଇ ମଳିନ

ଶୀଶିର ପାତେ ଯେସନେ ଲୁଚଇ ନଳୀନ

• ତୁମ ବିନା ଦରଶନେ ହେଉଛି ସେପରି

ଆହେ ବ୍ରହ୍ମାଣ୍ଡ ନାୟକ ବୈକୁଣ୍ଠ ବିହାରି ।।

•

• ତୁମେ ଦୟାର ସାଗର ଦୟାନିଧି ନାମ

ପତିତ ତାରଣେ ନାମ ପତିତପାବନ

• ସହନଶୀଳତା ପଣେ ଶ୍ରୀବତ୍ସ ଲାଞ୍ଛନ

ଦୁଃଖୀ ଜନର ସଂଗାତ ହେ ରମାରମଣ

• ନିରତେ ଯାପଇ ଦିନ ତୁମକୁ ସୁମରି

ଆହେ ବ୍ରହ୍ମାଣ୍ଡ ନାୟକ ବୈକୁଣ୍ଠ ବିହାରି ।।

•

• ସୁଷ୍କ ସଲିଳେ ସରସୀ ପରାୟ ବିଦିର୍ଣ୍ଣ-

ହୁଏ,ତମ-ମୟ ଦେଖ ହେଲାଣି ଜୀବନ

• ମଉଳା ବାସି-ସୁମନ ସମାନ ଏ ମନ

ବିଷାଦେ କଟଇ ତବ ବିହୁନେ ମୋ ଦିନ

• କି ଦୋଷେ ଦଣ୍ଡୁଛ କିବା ଦୋଷ ଦଇତାରି

ଆହେ ବ୍ରହ୍ମାଣ୍ଡ ନାୟକ ବୈକୁଣ୍ଠ ବିହାରି ।।

•

• ତୁମ ନାମ ଗୁଣ ସୁଧା ସାଗର ଲହରୀ

ଏ ଜୀବନ ମନ ନିଏ ନିମଜ୍ଜିତ କରି

• ପ୍ରଫୁଲ୍ଲ ହୃଦୟ ପଦ୍ମ ତୁମେ ରବି କର

ମୋ ଚିତ୍ତକୁ ଭକ୍ତି,ପ୍ରେମେ କରହେ ବିଭୋର

• ଜୀବ ଛାଡିଯାଉ ଛନ୍ଦା ପଦକୁ ସୁମରି

ଆହେ ବ୍ରହ୍ମାଣ୍ଡ ନାୟକ ବୈକୁଣ୍ଠ ବିହାରି ।।