ଗୁହାରି ତୁମ ଶ୍ରୀଛାମୁରେ
ଗୁହାରି ତୁମ ଶ୍ରୀଛାମୁରେ
କାହିଁକି ମାଗିବି ଦିଅ ମୋତେ କିଛି
ମାଗିକି ମାଗନ୍ତା ହେବି ନାହିଁ ହେ
ଦେଇଛ ଯେତିକି ସେତିକିରେ ଖୁସି
ତୁମର ଚିନ୍ତନ କରୁଥିବି ହେ ।
ଧନ ବଇଭବ କିଛି ଦିନ ପାଇଁ
ତୁମର କରୁଣା ମିଳୁଥାଉ ହେ
ଲୋଭ ମୋହ ପଛେ ଧାଇଁବିନି ପ୍ରଭୁ
ତୁମର ସାନ୍ନିଧ୍ୟ ଇଛା କରୁଥିବି ହେ ।
ସତ୍ୟ ଧର୍ମ ପଥେ ଥିବି ଯଦି ମୁହିଁ
ତୁମେ ମୋର ସାଥେ ରହୁଥିବ ହେ
ତୁଛ ଏ ଜୀବନ କିଛି ଦିନ ପାଇଁ
ତୁମ ସେବାରେ ମନ ଦେଉଥିବି ହେ ।
ଜଳ ବିନା ମୀନ ହନ୍ତସନ୍ତ ସିନା
ତୁମ ବିନା ଛଟପଟ ମୁଁ ହୁଏ ହେ
ତୁମେ ମୋର ହାତ ଧରିଛ ବୋଲିକି
ମନେ ଆଶା କେତେ ବାନ୍ଧିଅଛି ହେ ।
ଥକିଯିବି ଯଦି ଏ ଜୀବନ ସୁଅରେ
ହସ୍ତ ଧରି ଅଡାଇ ଦେବ ହେ
ପଥେ ମୋ ସାଥିରେ ପଥିକଟି ସାଜି
ଅବାଟୁ ଦୂରରେ ରଖୁଥିବ ହେ ।
କରୁଣାମୟ ହେ ଏତିକି କରୁଣା
ମୋର ପ୍ରତି ସବୁଦିନ ଥାଉ ହେ
ଜାଣେନା ଏ ପ୍ରାଣ କେତେ ଦିନ ପାଇଁ
ଉଡିଯିବ ପକ୍ଷୀ କେତେବେଳେ ହେ ।